బాంబినో కుటుంబ ఆస్తుల వివాదం..

ఫాస్ట్-మూవింగ్ కంజ్యూమర్ గూడ్స్ (FMCG) రంగంలో బాంబినో బ్రాండ్ పేరు అందరికీ తెలిసిందే. ఈ సంస్థ స్థాపకుడు మాధం కిషన్ రావు 2021లో కన్నుమూశారు. ఆయన మరణానంతరం కుటుంబ సభ్యుల మధ్య ఆస్తుల పంపకంలో తీవ్ర విభేదాలు చోటు చేసుకున్నాయి. తాజాగా ఆయన మనవడు కార్తికేయ ఈ విషయంలో పోలీసులకు ఫిర్యాదు చేసి నలుగురు మహిళలపై రూ. 40 కోట్ల షేర్, ఆస్తుల మోసాల కేసు నమోదు చేసాడు.

కిషన్ రావు తన పేరు మీద రేవతి తోభాకో కంపెనీ Pvt Ltd లో 98.23% షేర్లు కలిగివున్నారు. అతని మరణం తర్వాత, ఆ షేర్లను ఆయన కుమార్తెలు అక్రమ పత్రాలతో తమ పేర్లకు బదిలీ చేసుకున్నారని మనవడు కార్తికేయ ఫిర్యాదు చేశారు.

ఇంకా, ఆ కంపెనీకి చెందిన సుమారు 184 ఎకరాల స్థలాన్ని బ్యాంకులకు పూచిగా చూపించి రూ. 40 కోట్ల రుణం తీసుకున్నారు. ఇది కంపెనీ ఆర్థిక పరిస్థితులపై తీవ్ర ప్రభావం చూపింది. ఫిర్యాదులో చెప్పబడినట్టు, ఈ ఒప్పందాలు బోర్డు ఆమోదం లేకుండా జరిగాయని, ఫోర్జరీ చేసి మోసం చేసినట్లుగా భావిస్తున్నారు.

పోలీసులు ఈ కేసును భారతీయ శిక్షాస్మృతిలోని (IPC) సెక్షన్‌లు 405, 406, 417, 420తో పాటు 34 మరియు 120-B కింద, అదేవిధంగా భారతీయ నాగరిక సురక్షా సంహిత (BNSS) చట్టంలోని సెక్షన్ 175(3) ప్రకారం నేరాలు నమోదు చేసి, నలుగురు మహిళలను (అనూరాధ, శ్రీదేవి, అనందదేవి, తుల్జాభవాని) నిందితులుగా పేర్కొన్నారు.

ఈ కుంభకోణం వెనుక కుటుంబ కలహాలు, షేర్ బదిలీలు, కంపెనీ పాలనా లోపాలు వెలుగులోకి వస్తున్నాయి. కుటుంబ సభ్యుల మధ్య అవగాహన లేకపోవడం, సరైన డాక్యుమెంటేషన్ లేకపోవడం ఈ సమస్యలకు ప్రధాన కారణమని నిపుణులు భావిస్తున్నారు.

వారసత్వంలో వ్యత్యాసాలు, కంపెనీ పాలనలో లోపాలు పెద్ద మోసాలకు దారి తీస్తాయన్న నిజాన్ని ఈ కేసు స్పష్టంగా చూపించింది. ఒక సమగ్ర, పారదర్శకమైన వారసత్వ ప్రణాళిక లేకపోతే, కుటుంబాల్లో కలహాలు, న్యాయ పోరాటాలు తప్పవు. పారదర్శకత లేకపోతే విలువైన ఆస్తులు కూడా కోల్పోతారు. బాంబినో కేసు ఇతర వ్యాపార కుటుంబాలకు ఒక పాఠం.