Gulte Telugu Telugu Political and Movie News Updates
ఆస్ట్రేలియాతో జరుగుతున్న నాలుగవ టెస్ట్ మ్యాచ్లో రిషబ్ పంత్ ఔట్ అయిన తీరు ఇప్పుడు క్రికెట్ లవర్స్ మధ్య హాట్ టాపిక్గా మారింది. మూడో రోజు భారత ఇన్నింగ్స్లో ఆస్ట్రేలియా పేసర్ బోలాండ్ బౌలింగ్లో పంత్ చేసిన స్కూప్ షాట్ మ్యాచ్ను భారత్ కోసం మరింత క్లిష్ట పరిస్థితిలోకి నెట్టింది. ఫైన్ లెగ్ దిశలో స్కూప్ ప్రయత్నం చేసి తన వికెట్ను సులభంగా కోల్పోయాడు.
ఈ ఘటనపై క్రికెట్ దిగ్గజం సునీల్ గవాస్కర్ తీవ్ర అసహనంతో లైవ్ కామెంటరీలో వ్యాఖ్యానించారు. స్టుపిడ్.. స్టుపిడ్.. స్టుపిడ్ అంటూ.. ‘‘ఇలాంటి షాట్ ఆడే స్థితిలో భారత జట్టు లేదు’’ అని చెప్పిన గవాస్కర్, రిషబ్ నిర్ణయంపై తీవ్ర అసంతృప్తిని వ్యక్తం చేశారు. “ఇది నువ్వు నీ సహజ ఆటగా చెప్పలేవు. జట్టు పరిస్థితిని అర్థం చేసుకోవాలి. టీమిండియా ముందు ఉండే ప్రతి వికెట్ కీలకమైనది” అని రిషబ్ నిర్ణయాన్ని తప్పుపట్టారు.
గతంలో కూడా గవాస్కర్ పంత్ షాట్ ఎంపికపై విమర్శలు చేశారు. 2022లో దక్షిణాఫ్రికాతో జరిగిన టెస్టు మ్యాచ్లో, పంత్ ఆడిన నిర్లక్ష్య షాట్పై గవాస్కర్ అసంతృప్తి వ్యక్తం చేశారు. అలాంటి పరిస్థితుల్లో బాధ్యతగా ఆడాల్సిన అవసరం ఉందని, పంత్ ఆటతీరు క్షమించరానిదని గవాస్కర్ అన్నారు. లేటెస్ట్ గా గవాస్కర్ వ్యాఖ్యలు సర్వత్రా చర్చనీయాంశంగా మారాయి. పంత్ షాట్ ఎంపికను అభిమానులు, క్రికెట్ విశ్లేషకులు కూడా సమర్థించలేకపోతున్నారు.
ఇండియన్ జట్టుకు అప్పటికే స్కోరు బోర్డు మీద ఒత్తిడి ఉన్న సమయంలో, ఇలాంటి నిర్ణయాలు మరింత దుష్ఫలితాలు తీసుకొస్తాయని స్పష్టమైంది. కాగా, పంత్ ఔట్ అయిన తరువాత టీమిండియా ఇంకా ఇబ్బందుల్లో పడింది, తద్వారా ఆసీస్ జట్టు తమ ఆధిపత్యాన్ని మరింత బలపరుచుకుంది. దీనికి సంబంధించిన వీడియో క్లిప్ సోషల్ మీడియాలో వైరల్గా మారింది.
పంత్పై కొన్ని విమర్శలు ఎదురవుతుండగా, మరికొందరు మాత్రం పంత్ను మద్దతుగా నిలుస్తున్నారు. ‘‘ఇది టీ20 ఆట కాదు, టెస్ట్ క్రికెట్కు అలాంటి ఆట సరిపోదు’’ అంటూ విశ్లేషకులు సూచిస్తున్నారు. మరోవైపు పంత్ ఫ్యాన్స్ మాత్రం ఆయన ధైర్యవంతమైన ఆటను సమర్థించడానికి ప్రయత్నిస్తున్నారు. క్రికెట్లో ప్రతి నిర్ణయం కీలకమైనదని, రిషబ్ లాంటి ఆటగాళ్లు జట్టు స్థితిని అర్థం చేసుకోవడం అవసరమని విశ్లేషకులు సూచిస్తున్నారు.
