ది ఫ్యామిలీ మెన్ కేసీఆర్

దేశంలో చాలామంది ముఖ్యమంత్రులు ఉన్నారు. వారెవరిలో కనిపించని విలక్షణ కోణాలు తెలంగాణ రాష్ట్ర ముఖ్యమంత్రిలో కనిపిస్తాయి. దేశంలోని సీఎంల గురించి అవగాహన లేకుంటే.. రెండు తెలుగు రాష్ట్రాల్లో ఇప్పటివరకూ సీఎంలుగా వ్యవహరించిన వారికి కాస్త గుర్తు తెచ్చుకోండి. వారెవరిలో లేని చాలా కోణాలు కేసీఆర్ లో కనిపిస్తాయి.

ప్రజలతోనూ.. పార్టీ నేతలతోనూ పరిమితంగా సంబంధాలు పెట్టుకునే ఆయన తీరు తరచూ చర్చనీయాంశంగా ఉంటుంది. అయితే.. తనను విభేదించే వారి చేత కూడా మొనగాడ్రా భయ్ అన్న మాట తరచూ వినిపిస్తూ ఉంటుంది. ఇదంతా ఒక ఎత్తు అయితే.. కేసీఆర్ లో కనిపించే ఫ్యామిలీ మెన్ మరే ముఖ్యమంత్రిలోనూ కనిపించదని చెప్పాలి.

కొండపోచమ్మ సాగర్ ప్రారంభోత్సవానికి సతీసమేతంగా వెళ్లిన ఆయన.. ఆమె పక్కన కూర్చోవటమే కాదు.. ఆమెకు అక్కడి విశేషాల్ని తానే స్వయంగా చెప్పే తీరు చూస్తే ముచ్చటపడాల్సిందే. తానో రాష్ట్ర ముఖ్యమంత్రి అన్న విషయం కంటే కూడా తన జీవితభాగస్వామి విషయంలో ఆయన ప్రదర్శించే శ్రద్ధను చూసినోళ్లంతా ఫిదా అవుతుంటారు.

ఏదైనా ప్రోగ్రామ్ కు శ్రీమతిని తీసుకొచ్చే ముఖ్యమంత్రులే తక్కువ అయితే.. అలా తీసుకొచ్చిన తర్వాత.. ఆమెకు ఇబ్బంది కలగకుండా జాగ్రత్తలు వహిస్తూ.. ఆమెకు బోర్ కొట్టకుండా తనతో పాటుగా తీసుకెళ్లే తీరు చూస్తే.. పర్ ఫెక్ట్ ఫ్యామిలీమెన్ కు కేరాఫ్ అడ్రస్ గా కేసీఆర్ కనిపిస్తారు. ఇవాల్టి రోజున చాలా మీడియా సంస్థలు తాము ప్రచురించిన ఫోటోల్లో కేసీఆర్ లోని మరో కోణాన్ని చూపించే ఈ ఫోటోను ప్రత్యేకంగా ప్రచురించటాన్ని చెప్పక తప్పదు.