రెబల్ అభ్యర్థుల్లోనూ కూటమిదే పై చేయి

పరిషత్ ఎన్నికల ఫలితాలు కూడా వచ్చేశాయి. మున్సిపల్ ఎన్నికల తరహాలోనే పరిషత్ ఎన్నికల్లో కూడా కూటమి జైత్రయాత్ర కొనసాగింది. కోస్తా, రాయలసీమ, ఉత్తరాంధ్ర, గోదావరి జిల్లాలన్నీటిలోనూ ఒకటే రిజల్ట్స్ వచ్చాయి. కూటమి ఏకపక్ష విజయం సాధించింది. బీ ఫాం తీసుకొని అధికారికంగా కూటమి అభ్యర్థిగా పోటీ చేసిన వారే కాదు పార్టీ నిర్ణయాన్ని వ్యతిరేకించి రెబల్ గా పోటీకి దిగిన వారిలో కూడా కూటమి అభ్యర్థులే విజయం సాధించడం గమనార్హం. అంటే అధికశాతం ప్రజల్లో వైసీపీ పట్ల ఎంత వ్యతిరేకత వుందో అర్ధం అవుతుంది.

నెల్లూరు జిల్లాలోని ఇందుకూరు, జలదంకి, ఆత్మకూరు, వెంకటాచలం మండలాల్లో ఆరుగురు రెబల్ అభ్యర్థులు గెలుపొందారు. ఈ ఆరుగురు రెబల్ అభ్యర్థులు కూడా టీడీపీ సీటు దక్కక పోవడంతో పోటీ చేసిన వారే. శ్రీకాకుళం జిల్లాలో ఏకంగా 16 మంది రెబల్స్ గెలుపు జెండా ఎగరేయగా దాదాపుగా వారంతా టీడీపీకి చెందినవారే అత్యధికంగా వున్నారు.

తిరుపతి జిల్లాలో ఆరుగురు స్వతంత్రులు విజయం సాధించారు. వారిలో ఐదుగురు టీడీపీ, ఒకరు జనసేన రెబల్ అభ్యర్థి వున్నారు. కాకినాడలో ఐదుగురు, పిఠాపురంలో ఒకరు, తూర్పుగోదావరి జిల్లాలో నలుగురు టీడీపీ, జనసేన రెబల్స్ గెలిచారు. విజయనగరం జిల్లాలో అయితే ఏకంగా 28 మంది రెబల్స్ గెలిచారు. కృష్ణాలో 8 మంది గెలిచారు.

రాష్ట్ర వ్యాప్తంగా మొత్తం 66 స్థానాల్లో స్వతంత్రులు విజయ పతాకం ఎగరేశారు. చివరి ఫలితాలు బట్టి మరికొన్ని స్థానాల్లో కూడా గెలిచే అవకాశం వుందని తెలుస్తోంది. నిజానికి రెబల్ అభ్యర్థి నిలబడిన చోట అధికారికంగా పోటీ చేసిన అభ్యర్థితో పాటుగా రెబల్ అభ్యర్థి కూడా ఓటమి పాలవుతారు. ఒకే పార్టీ తరుపున ఇద్దరు పోటీ పడితే ఓట్లు చీలి మధ్యలో మూడో పార్టీ గెలుస్తుంది. వైసీపీ కూడా అదే అంచనా వేసుకుంది. అయితే ప్రజలు మాత్రం వైసీపీ వైపు కన్నెత్తి చూళ్ళేదు. టీడీపీ అధికారిక, తిరుగుబాటు అభ్యర్థులలో ఒకరిని ఎన్నుకున్నారు. ఇది వైసీపీ నాయకులు జీర్ణించుకోలేక పోతున్నారు.