ముగ్గుర్ని చంపేస్తే నాన్న చూసుకుంటాడా?

ఈ మధ్యకాలంలో హిట్ అండ్ రన్ కేసులు ఎక్కువవుతున్నాయి. ఇక, కొందరు డబ్బున్న బడాబాబుల పిల్లలు, కొందరు రాజకీయ నాయకుల పిల్లలైతే హిట్ అండ్ స్టే కేసులతో వార్తల్లో నిలుస్తున్నారు. అంటే, యాక్సిడెంట్ చేసిన తర్వాత ఏ మాత్రం రిగ్రెట్ లేకుండా మా నాన్న చూసుకుంటాడులే అన్న ధైర్యంతో వ్యవహరిస్తున్నారు.

తాజాగా కేరళంలో అటువంటి ఘటనే ఒకటి జరిగింది. 19 ఏళ్ల యువకుడు యాక్సిడెంట్ చేసిన తర్వాత…ఏమైనా మా నాన్న చూసుకుంటాడు అంటూ తన మిత్రులతో చెప్పిన వైనం ఇప్పుడు షాకింగ్ గా మారింది.

కేరళంకు చెందిన 19 ఏళ్ల కొడుకు సుహైల్ సజీవ్ ను కోటీశ్వరుడైన తండ్రి గారాబంగా పెంచాడు. అతి ప్రేమతో కొడుకు బర్త్ డే గిఫ్ట్ కింద కోట్ల ఖరీదు చేసే మినీ కూపర్ కారు కొనిచ్చాడు. అయితే, ఆ కొత్త కారులో ఈ కుర్రకారు పార్టీ చేసుకునేందుకు వెళ్తున్నారు. ఎర్నాకులం జిల్లా కొచ్చి విమానాశ్రయం సమీపంలో అతి వేగంగా దూసుకువెళ్లిన ఆ మినీ కూపర్…ఓ కారు, బైక్‎ను ఢీకొట్టింది. ఈ ఘటనలో ముగ్గురు విద్యార్థులు మృతి చెందారు. కారును నడుపుతున్న 19 ఏళ్ల సుహైల్ ‎ను స్థానికులు పట్టుకుని పోలీసులకు అప్పగించారు.

అంతవేగంగా కారు ఎందుకు నడిపావని సుహైల్‎ను స్థానికులు ప్రశ్నించారు. అయితే, నో ప్రాబ్లమ్.. మా నాన్న అంతా చూసుకుంటాడు అంటూ నిర్లక్ష్యంగా, అహంకారపూరితంగా సమాధానమిచ్చాడు సుహైల్. తన ర్యాష్ డ్రైవింగ్ వల్ల ముగ్గురు చనిపోయాన్న పశ్చాత్తాపం ఏమాత్రం వ్యక్తం చేయలేదు సుహైల్. ఇక, తాను కేవలం బీరు తాగి డ్రైవ్ చేసినట్లు పోలీసుల ఎదుట సుహైల్ అంగీకరించాడని తెలుస్తోంది.