బీసీ రిజర్వేషన్లపై తేల్చేసిన సుప్రీం

ఆంధ్రప్రదేశ్ లో త్వరలో జరగనున్న స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పిస్తూ ఏపీ ప్రభుత్వం ప్రత్యేకంగా అసెంబ్లీలో జీవో పాస్ చేసిన సంగతి తెలిసిందే. అయితే, రిజర్వేషన్లు 50 శాతం మించకూడదు అని సుప్రీం కోర్టు మార్గదర్శకాలకు ఈ జీవో విరుద్ధంగా ఉందని ఏపీ హైకోర్టు ఆ జీవోను రద్దు చేసింది. ఈ క్రమంలోనే హైకోర్టు తీర్పును సవాల్ చేస్తూ సుప్రీంకోర్టులో ఏపీ ప్రభుత్వం స్పెషల్ లీవ్ పిటిషన్ దాఖలు చేసింది. ఈ నేపథ్యంలోనే తాజాగా ఏపీ సర్కార్ కు సుప్రీం కోర్టు షాకిచ్చింది. హైకోర్టు తీర్పును సమర్థించిన సుప్రీం కోర్టు ఏపీ ప్రభుత్వం దాఖలు చేసిన పిటిషన్ ను కొట్టివేసింది.

ఈ విచారణ సందర్భంగా సుప్రీం కోర్టు కీలక వ్యాఖ్యలు చేసింది. ఏపీ ప్రభుత్వం నిర్వహించిన కుటుంబ సర్వేను ఏ రకంగా ప్రామాణికంగా తీసుకుంటారని ఏపీ ప్రభుత్వం తరఫు న్యాయవాది ముకుల్ రోహత్గీని ప్రశ్నించింది. అయితే, ఎందుకు తీసుకోకూడదని ముకుల్ రోహత్గీ వాదించారు. పూర్తిస్థాయిలో వాదనలు వినిపించేందుకు మరికొంత సమయం కావాలని ఆయన కోరారు. అయితే, అందుకు నిరాకరించిన సుప్రీం కోర్టు ఏపీ ప్రభుత్వం దాఖలు చేసిన పిటిషన్ కొట్టివేసింది. దీంతో, బీసీలకు మరిన్ని రాజకీయ అవకాశాలు కల్పించాలన్న సీఎం చంద్రబాబు సంకల్పానికి అడ్డుకట్టపడినట్లుంది.

అయితే సుప్రీంకోర్టు తీర్పునకు సంబంధం లేకుండా బీసీలకు 34 శాతం రిజర్వేషన్లు కల్పించాలని చంద్రబాబు నిర్ణయం తీసుకున్న సంగతి తెలిసిందే. ఆయా నియోజకవర్గాలలో బీసీలకు 34 శాతం కోటా ప్రకారం ఇవ్వాలని చంద్రబాబు ఫిక్స్ అయ్యారు. తాజాగా సుప్రీంకోర్టు తీర్పు నేపథ్యంలో మరో నాలుగైదు రోజుల్లో స్థానిక సంస్థల ఎన్నికల నోటిఫికేషన్ విడుదలయ్యే అవకాశం ఉంది.