గోరు ముద్దలు కాదు విషపు ముద్దలు తినిపించారు

వైసీపీకి చెందిన మాజీ మంత్రి జోగి రమేష్ కుటుంబ వ్యవహారం ఇంకా చల్లారలేదు. అదనపు కట్నం కోసం అత్తా మామలు తనను వేదిస్తున్నారంటూ జోగి రమేష్ కోడలు మేఘన ఇబ్రహీంపట్నం పోలీసులకు ఫిర్యాదు చేయడంతో ఈ రచ్చ వెలుగులోకి వచ్చింది. మేఘనను కూతురిలాగ చూసుకున్నామని, గోరు ముద్దలు తినిపించామని జోగి రమేష్ చెబుతుంటే నాకు గోరు ముద్దలు కాదు విషపు ముద్దలు తినిపించారని కోడలు మేఘన చెబుతుంది. మంగళవారం మీడియాతో మేఘన మాట్లాడింది.

మైలవరం ఎమ్మెల్యే వసంత కృష్ణ ప్రసాద్ తో కలిసి మాట్లాడిన తర్వాత నా కోడలు మేఘన పోలీసులకు ఫిర్యాదు చేసిందని జోగి రమేష్ ఆరోపించారు. దీనికి స్పందించిన మేఘన… ఔను నేను ఎమ్మెల్యే వసంత కృష్ణ ప్రసాద్ తో మాట్లాడింది నిజమే… నా సమస్య పరిష్కరిస్తానని చెప్పారు. అంతకుముందు వైసీపీ అధినేత జగన్ తో కలిసేందుకు ప్రయత్నం చేశాను. కానీ కుదరలేదని చెప్పారు.

నన్ను కూతురిలాగ చూసుకొని వుంటే సమస్య వచ్చేది కాదన్నారు. అదనపు కట్నం తీసుకొని వస్తే నువ్వు హ్యాపీగా ఉంటావని మా అత్త శకుంతల చెప్పారని తెలిపిన మేఘన పెళ్ళైన రెండు నెలలకే రాజీవ్ ఎందుకు పిటీషన్ వేసాడని ప్రశ్నించారు. తన భర్త రాజీవ్ కు వున్న శారీరక లోపాలను దాచిపెట్టి పెళ్లి చేశారని, ఆయనకు ట్రీట్మెంట్ ఇప్పిస్తామంటూ నన్ను పుట్టింటికి పంపించారని తెలిపారు.

పెళ్ళికి ముందు హిందువులమని చెప్పారని, పెళ్లయ్యాక క్రైస్తవం స్వీకరించినట్లు చెబుతున్నారని వివరించారు. జోగి రమేష్ ఇంట్లో పూజ గది లేదని, నా దగ్గర ఆధారాలు వున్నాయి, అవసరం వచ్చినప్పుడు అన్నీ బయట పెడతాను అని వెల్లడించారు.

మాకు ఎలాంటి రాజకీయ నేపథ్యం లేదు. తప్పు చేయకుండా శిక్ష అనుభవిస్తున్నాను. ఏడాదిగా కుమిలి పోతున్నాను. న్యాయం జరిగే వరకు పోరాటం కొనసాగిస్తానంటూ మేఘన స్పష్టం చేశారు. దీంతో జోగి రమేష్ కుటుంబం చిక్కుల్లో పడినట్లు కనిపిస్తుంది. ఇప్పటికే జోగి రమేష్ నకిలీ మద్యం కేసులో అరెస్టయి జైలు శిక్ష కూడా అనుభవించారు. ఆ కేసు లో బెయిల్ మీద వున్న ఆయనకు ఇంటిపోరు మరింత తలనొప్పిగా మారింది. రాజకీయంగా వైసీపీ కి ఏమి చేయాలో పాలుపోని పరిస్థితి తీసుకొచ్చింది. అందుకే కోడలి వ్యవహారంలో వైసీపీ ముట్టీముట్టనట్లుంటుందని ప్రచారం జరుగుతుంది.