మాజీ ముఖ్యమంత్రి తనయుడు అరెస్టు… అక్కడ పొలిటికల్ హీట్!

తమిళనాడు అసెంబ్లీలో ప్రతిపక్ష నాయకుడు, మాజీ ముఖ్యమంత్రి కుమారుడు ఉదయనిధి స్టాలిన్‌ను పోలీసులు మంగళవారం అదుపులోకి తీసుకున్నారు. నటి త్రిష, ముఖ్యమంత్రి విజయ్‌పై పరువునష్టం కలిగించేలా వ్యాఖ్యలు చేశారన్న ఆరోపణలపై నమోదైన ఎఫ్‌ఐఆర్‌ ఆధారంగా చెన్నైలోని ఆయన నివాసానికి వెళ్లిన పోలీసులు విచారణ నిమిత్తం అదుపులోకి తీసుకున్నారు.

తంజావూరులో కావేరి జలాల అంశంపై పార్టీ కార్యకర్తల సమావేశంలో ప్రసంగించిన సందర్భంగా, “ముఖ్యమంత్రి విజయ్‌కు ఒకటే టెన్షన్ ఉంది” అని ఉదయనిధి వ్యాఖ్యానించగా, అక్కడున్న కొందరు కార్యకర్తలు “త్రిష” అంటూ నినాదాలు చేశారు. ఈ పరిణామంపై తమిళగ వెట్రి కళగం (టీవీకే) తీవ్ర అభ్యంతరం వ్యక్తం చేస్తూ, కార్యకర్తలతో ఉద్దేశపూర్వకంగానే అలాంటి నినాదాలు చేయించారని ఆరోపించింది. దీనిపై కేసు నమోదుకాగా, టీవీకే కార్యకర్తలు చెన్నైలో నిరసనలు చేపట్టారు.

అరెస్టును అడ్డుకోవాలని డీఎంకే మద్రాస్ హైకోర్టును అత్యవసరంగా ఆశ్రయించింది. బుధవారం తమిళనాడు బడ్జెట్ సమావేశాలు ప్రారంభం కానున్న నేపథ్యంలో ఈ చర్య రాజకీయ కక్షసాధింపేనని డీఎంకే విమర్శించింది. తన అరెస్టుపై స్పందించిన ఉదయనిధి స్టాలిన్, “నేను ఎవరి పేరూ ప్రస్తావించలేదు. అసభ్యకరంగా కూడా మాట్లాడలేదు. అరెస్టుకు భయపడను. చట్టపరంగా ఎదుర్కొనేందుకు సిద్ధంగా ఉన్నాను” అని తెలిపారు.