విజయ్… కొంతయినా జాలి కలిగేనా?

దళపతి విజయ్ ఇప్పుడు అత్యంత క్లిష్టమైన దశలో ఉన్నాడు. ఒకవైపు 30 ఏళ్ల సినీ కెరీర్‌ను వదిలేసి పూర్తిస్థాయి రాజకీయాల్లోకి రావాలనే బలమైన నిర్ణయం, మరోవైపు చుట్టూ అల్లుకున్న వివాదాలు ఆయన ప్రయాణాన్ని సవాల్ చేస్తున్నాయి. తమిళగ వెట్రి కళగం (TVK) పార్టీని స్థాపించి, 2026 అసెంబ్లీ ఎన్నికల్లో 234 స్థానాల్లో ఒంటరిగా పోరాడుతామని ప్రకటించిన విజయ్‌కు.. రాజకీయ క్షేత్రంలో అడుగుపెట్టకముందే వరుస ఎదురుదెబ్బలు తగులుతున్నాయి. వ్యక్తిగత జీవితంపై వస్తున్న పుకార్లు, కరూర్ సభలో జరిగిన తొక్కిసలాట వంటి ఘటనలు ఒక కొత్త నాయకుడికి ఉండకూడని ‘నెగెటివ్ స్టార్ట్’ను ఇచ్చాయి.

ఇలాంటి పరిస్థితుల్లో తన చివరి సినిమా ‘జననాయగన్’ ఎడిటింగ్ రూమ్ నుండే లీక్ అవ్వడం విజయ్‌ను మరింత ఇబ్బందుల్లోకి నెట్టింది. సాధారణంగా ఏ హీరో కూడా తన సినిమా లీక్ అవ్వాలని కోరుకోడు, ఎందుకంటే అది వందల కోట్ల బిజినెస్ మీద నేరుగా దెబ్బ కొడుతుంది. కానీ, విజయ్ విషయంలో ఈ లీక్ ఇష్యూ ఇప్పుడు ప్రజల్లో ఒక రకమైన ‘సింపతీ’ని క్రియేట్ చేసే అవకాశం కనిపిస్తోంది. “ఒక మనిషిని ఎన్ని రకాలుగా టార్గెట్ చేస్తారు?” అనే భావన సామాన్య జనం లోనూ, ముఖ్యంగా యూత్‌లోనూ బలపడే ఛాన్స్ లేకపోలేదు. ఇది విజయ్‌కు రాజకీయంగా పరోక్షంగా ప్లస్ అయ్యే ఛాన్స్ ఉంది.

విజయ్ తన రాజకీయ అరంగేట్రం కోసం పెరంబూర్, తిరుచ్చి ఈస్ట్ వంటి కీలక స్థానాలను ఎంచుకున్నారు. అయితే అతను గెలవాలంటే కేవలం ఫ్యాన్ బేస్ సరిపోదు, ప్రజల్లో ఒక బలమైన నమ్మకాన్ని కలిగించాలి. గతంలో జరిగిన త్రిష వివాదం లేదా విడాకుల రూమర్లు ఇమేజ్‌ను డ్యామేజ్ చేసేలా ఉన్నప్పటికీ, వరుసగా జరుగుతున్న ఈ పరిణామాలు చూస్తుంటే కావాలనే ఎవరో అణిచివేస్తున్నారనే భావన రాకుండా కూడా ఉండదు. ఒక నాయకుడికి ‘బాధితుడు’ అనే ఇమేజ్ వస్తే, అది ఓట్ల రూపంలో మారడానికి ఎక్కువ సమయం పట్టదు.

సినిమా లీక్ అనేది కేవలం ఒక ఆర్థిక నష్టం మాత్రమే కాదు, అది ఒక టెక్నికల్ వెన్నుపోటు. తన సొంత ఇండస్ట్రీ వారే తనను మోసం చేశారనే వార్త విజయ్ మీద కొంత జాలి కలిగేలా చేస్తోంది. రాజకీయాల్లో ఎప్పుడూ ఒక పాయింట్ ఉంటుంది.. ప్రత్యర్థులు ఎంతగా అణిచివేస్తే, ఆ నాయకుడు అంతగా ప్రజల్లోకి వెళ్తాడు. ఇప్పుడు విజయ్ విషయంలో కూడా ఇదే జరుగుతోందా అనే సందేహం కలుగుతోంది. ఈ వరుస విపత్తులను విజయ్ ఎలా హ్యాండిల్ చేస్తారు? తన మీద పెరుగుతున్న ఈ సింపతీని ఎలా వాడుకుంటారు? అనేది ఇప్పుడు ఓ వర్గంలో హాట్ టాపిక్ గా మారింది.

రాజకీయాల్లోకి వచ్చే ఎవరైనా మొదట ఎదుర్కొనేది విమర్శలే. కానీ విజయ్ విషయంలో అవి విమర్శల స్థాయి దాటి కుట్రల స్థాయికి వెళ్లాయనే టాక్ తమిళనాట వినిపిస్తోంది. కరూర్ సభలో జరిగిన తొక్కిసలాట విజయ్ మేనేజ్మెంట్ లోపమా లేక కావాలనే సృష్టించిన అల్లరా అనే కోణంలోనూ చర్చలు సాగుతున్నాయి. ఇన్ని అవరోధాల మధ్య విజయ్ 234 స్థానాల్లో ఒంటరిగా పోటీ చేయడం అనేది ఒక సాహసోపేతమైన నిర్ణయం. ఈ సాహసానికి ప్రజల మద్దతు లభించాలంటే ఆయన ఈ వివాదాలన్నిటినీ తన నిజాయితీతో చెరిపివేయాల్సి ఉంటుంది. మరి ఏం జరుగుతుందో తెలియాలంటే మరికొన్ని రోజుల వరకు ఆగాల్సిందే.