సరైనోడి చేతిలో పడ్డ సందీప్ కిషన్

పదిహేను సంవత్సరాల క్రితం పరిశ్రమకు వచ్చిన సందీప్ కిషన్ మధ్యలో హిట్లు పడుతున్నా కెరీర్ సరైన క్రమంలో ఒక మార్కెట్ దిశగా వెళ్లలేకపోయింది. అందుకే సబ్జెక్టులు ఎంత వైవిధ్యంగా ఎంచుకున్నా సక్సెస్ మాత్రం పుష్కరానికోసారి పలకరించేది. కానీ ఈసారి లెక్కలు మారుతున్నట్టు కనిపిస్తోంది. ఊరు పేరు భైరవకోనతో చెప్పుకోదగ్గ విజయన్ని ఖాతాలో వేసుకున్న ఈ యూత్ హీరో ధనుష్ దృష్టిలో పడ్డం వల్ల ఒకే ఏడాది రెండు తమిళ సినిమాల్లో ఛాన్స్ కొట్టేశాడు. కెప్టెన్ మిల్లర్ తెలుగులో ఆడలేదు కానీ తమిళంలో డీసెంట్ గా వర్కౌట్ చేసుకుంది. ఆ సెట్లోనే ధనుష్ పరిచయం రాయన్ ఆఫర్ ఇచ్చేలా చేసింది.

కట్ చేస్తే రాయన్ లో సందీప్ కిషన్ పెర్ఫార్మన్స్ కి మంచి మార్కులు పడుతున్నాయి. ఊరికే ఆవేశంతో ఊగిపోతూ పరిణామాలు ఆలోచించకుండా ముందు వెనుక చూసుకోకుండా దాడులకు తెగబడే తమ్ముడిగా తన నటన మీద బాగానే ప్రశంసలు వస్తున్నాయి. ముఖ్యంగా ఫస్ట్ హాఫ్ లో ఓవర్ సీరియస్ గా ఉన్న ధనుష్ కన్నా నవ్విస్తూ, మురిపిస్తూ, లవ్ చేసే మాస్ టచ్ ఉన్న సందీప్ కిషన్ క్యారెక్టర్ నే జనాలు ఇష్టపడ్డారు. అపర్ణ బాలమురళితో లవ్ ట్రాక్ కూడా బాగానే పండింది. అయితే తనకు ఇది మొదటి కోలీవుడ్ సక్సెస్ కాదు. సూపర్ హిట్స్ ఖాతాలో ఆల్రెడీ మానగరం, మాయావన్ ఉన్నాయి.

కాకపోతే రాయన్ అక్కడి ఆఫర్లకు మంచి ప్రమోషన్ అయ్యేలా ఉంది. ప్రస్తుతం త్రినాధరావు నక్కిన దర్శకత్వంలో మజాకా ( పరిశీలనలో ఉన్న టైటిల్) చేస్తున్న సందీప్ కిషన్ దీని ద్వారా ఫ్యామిలీ ఆడియన్స్ కి మరింత చేరువ అవుతాననే నమ్మకంతో ఉన్నాడు. రావు రమేష్ కాంబోలో వచ్చే ఎపిసోడ్స్ హిలేరియస్ గా ఉంటాయట. మాస్ అంశాలు కూడా గట్టిగా ప్లాన్ చేశారని సమాచారం. క్రమంగా తెలుగులో చేసే సినిమాలు డబ్బింగ్ ద్వారా అయినా తమిళంలో కూడా రిలీజ్ చేసే విధంగా ప్లాన్ చేసుకుంటున్నాడు. పెద్ద బడ్జెట్ తో రూపొందుతున్న మాయావన్ 2తో అది మరింత బలపడుతుందని ధీమాగా ఉన్నాడు.