ఆ సంస్థకు శంకర్ శాపం

లైకా ప్రొడక్షన్స్.. ఇండియాలోనే అతి పెద్ద ప్రొడక్షన్ హౌస్‌ల్లో ఒకటి. 2.0 లాంటి మెగా బడ్జెట్ మూవీ నిర్మాణంతో అప్పట్లో ఆ సంస్థ పేరు మార్మోగింది. తమిళంలో మరిన్ని పెద్ద, మిడ్ రేంజ్ సినిమాలను ఆ సంస్థ ప్రొడ్యూస్ చేసింది. ఐతే సినిమాల స్కేల్, క్వాంటిటీ పరంగా లైకా స్థాయి పెద్దదే. కానీ ఆ సంస్థ సక్సెస్ రేట్ మాత్రం ఏమంత గొప్పగా లేదు.

‘కత్తి’ లాంటి బ్లాక్‌బస్టర్‌తో మొదలైన ఆ సంస్థ.. ఆ తర్వాత చాలా పరాజయాలు ఎదుర్కొంది. ముఖ్యంగా అగ్ర దర్శకుడు శంకర్ లైకాను కొట్టిన దెబ్బలు అలాంటిలాంటివి కావు. 2018లో ఆ సమయానికి ఇండియాలోనే హైయెస్ట్ బడ్జెట్లో ‘2.0’ను ప్రొడ్యూస్ చేసింది లైకా.

ఐతే ఆ ఖర్చుకు తగ్గ ఫలితాన్ని సినిమా రాబట్టలేకపోయింది. ఓపెనింగ్స్ బాగా వచ్చినా.. లాంగ్ రన్ లేకపోవడంతో పెట్టుబడి వెనక్కి రాలేదు. అప్పట్లోనే దాని బడ్జెట్ రూ.550 కోట్లని చెప్పుకున్నారు. లైకాకు ఆ సినిమా వల్ల వచ్చిన నష్టం వంద కోట్లకు తక్కువ ఉండదని అంచనా వేశారు. ఇక గత కొన్నేళ్లలో దర్బార్, చంద్రముఖి-2, పొన్నియన్ సెల్వన్, లాల్ సలామ్ లాంటి చిత్రాలతో చేదు అనుభవాలు ఎదుర్కొంది లైకా.

లేటెస్ట్‌గా ‘లైకా’ను ‘భారతీయుడు-2’ సినిమా కోలుకోలేని దెబ్బ తీసింది. ‘2.0’తో చేదు అనుభవం ఎదుర్కొన్నప్పటికీ శంకర్‌ను నమ్మి మరోసారి భారీ బడ్జెట్‌తో ‘భారతీయుడు-2’ మొదలుపెట్టాడు లైకా అధినేత సుభాస్కరన్. కానీ షూటింగ్ బాగా ఆలస్యమైంది. బడ్జెట్ పెరిగింది.

అది చాలదన్నట్లు క్రేన్ ప్రమాదం, కరోనా కారణంగా సినిమా రెండేళ్లు ఆగిపోయింది. తిరిగి గత ఏడాది చిత్రీకరణ పున:ప్రారంభమైంది. ఐతే బడ్జెట్ బాగా ఎక్కువైపోయిందని సినిమాను రెండు భాగాలు చేయాలనుకున్నారు. అలాగే కానిచ్చారు. తీరా చూస్తే 2 పార్ట్స్ ఆలోచన దారుణంగా బెడిసికొట్టింది.

‘భారతీయుడు-2’ డిజాస్టర్‌గా మిగిలింది. దీని మీద వచ్చిన థియేట్రికల్ ఆదాయం సినిమా మీద పెట్టిన బడ్జెట్లో పదో వంతు కూడా లేకపోవడం గమనార్హం. ఈ సినిమా డిజాస్టర్ కావడంతో ‘భారతీయుడు-3’ మీద ఆశలు లేకుండా పోయాయి. దాన్నుంచి వచ్చే ఆదాయం కూడా నామమాత్రమే కావచ్చు.

దీంతో ‘ఇండియన్-2’ మీద పెట్టిన పెట్టుబడి చాలా వరకు బూడిదలో పోసిన పన్నీరు అవుతున్నట్లే. మొత్తానికి 2.0, ఇండియన్ సీక్వెల్ సినిమాలతో శంకర్ లైకా వాళ్ల కొంప ముంచినట్లే కనిపిస్తున్నాడు.