మ్యాజికల్ కాంబో.. మళ్లీ

యువ కథానాయకుడు నితిన్ కెరీర్‌ను గొప్ప మలుపు తిప్పిన చిత్రం.. ఇష్క్. వరుసగా డజను ఫ్లాపులు ఎదుర్కొని ఇక కెరీర్ ముగిసినట్లే అనుకున్న తరుణంలో అతను ఈ చిత్రంతో బ్యాంగ్ బ్యాంగ్ రీఎంట్రీ ఇచ్చాడు. అప్పటికే ఇష్టం, 13 బి లాంటి చిత్రాలతో విలక్షణ దర్శకుడిగా గుర్తింపు సంపాదించినప్పటికీ.. కెరీర్ ముందుకు వెనక్కి అన్నట్లు సాగుతుండడంతో దర్శకుడు విక్రమ్ కుమార్ కూడా ఇబ్బంది పడుతుండేవాడు. అతణ్ని తెలుగులో బిజీ దర్శకుడిగా మార్చిన చిత్రం.. ఇష్క్.

పెద్దగా అంచనాల్లేకుండా విడుదలైన ఈ మూవీ.. సూపర్ హిట్ అయి తెలుగులో వచ్చిన బెస్ట్ లవ్ స్టోరీల్లో ఒకటిగా నిలిచిపోయింది. ఈ సినిమా పాటలు ఇప్పటికీ మార్మోగుతుంటాయి. ఈ చిత్రంతో వచ్చిన గుర్తింపుతో విక్రమ్.. మనం, 24 లాంటి పెద్ద సినిమాలు చేశాడు. కానీ మళ్లీ అతను నితిన్‌తో మాత్రం జట్టు కట్టలేదు.

ఐతే ఎట్టకేలకు మళ్లీ ఈ మ్యాజిక్ కాంబినేషన్ రిపీట్ కాబోతున్నట్లు సమాచారం. నితిన్ హీరోగా విక్రమ్ ఓ యాంబిషియస్ ప్రాజెక్టు చేయబోతున్నాడట. ఇది పెద్ద బడ్జెట్లో, విభిన్నమైన కథతో తెరకెక్కబోతోందట. నితిన్ కెరీర్లోనే అత్యధిక బడ్జెట్లో తెరకెక్కే సినిమా ఇదని.. ఇప్పటిదాకా ఎవ్వరూ టచ్ చేయని పాయింట్‌తో విక్రమ్ ఈ చిత్రం చేయబోతున్నాడని అంటున్నారు. త్వరలోనే పూర్తి వివరాలు వెల్లడి కానున్నాయి.

విక్రమ్ నుంచి ఈ మధ్య అంచనాలకు తగ్గ సినిమాలు రావట్లేదు. చివరగా ఆయన్నుంచి వచ్చిన ‘థాంక్యూ’ పెద్ద డిజాస్టర్ అయింది. అంతకుముందు రిలీజైన ‘గ్యాంగ్ లీడర్’ సైతం అంచనాలను అందుకోలేకపోయింది. ఐతే మధ్యలో ‘దూత’ వెబ్ సిరీస్‌తో విక్రమ్ ఆకట్టుకున్నాడు. ప్రస్తుతం దానికి సీక్వెల్ తీస్తున్నాడు. దాని తర్వాత నితిన్ సినిమాను పట్టాలెక్కిస్తాడు.