కమల్ సినిమాకు కమల్ సినిమా సంకటం

లోకనాయకుడు కమల్ హాసన్ ‘విక్రమ్’ మూవీతో గ్రాండ్ రీఎంట్రీ ఇచ్చారు. ఇక దీని కంటే ముందు మొదలై మధ్యలో ఆగి.. గత ఏడాది పున:ప్రారంభమై ఈ మధ్యే పూర్తయిన ‘ఇండియన్-2’ సినిమాను ప్రేక్షకుల ముందుకు తీసుకురావడానికి కమల్ అండ్ టీం ప్రయత్నిస్తోంది. ఈ చిత్రం జూన్‌లో రిలీజవుతుందని కొన్ని రోజుల కిందటే ప్రకటించిన సంగతి తెలిసిందే.

ఇండియన్-2 పాన్ ఇండియా సినిమా కాబట్టి పోటీ లేకుండా.. మంచి టైమింగ్ చూసి రిలీజ్ చేయాలి. ఐతే ఈ సినిమాను రిలీజ్ చేద్దామనుకున్న జూన్ నెలలోనే ‘కల్కి 2898 ఏడీ’ లాంటి భారీ చిత్రం రాబోతోంది. ఆ చిత్రానికి జూన్ 27ను రిలీజ్ డేట్‌గా ప్రకటించిన సంగతి తెలిసిందే. ఈ సినిమాలో కమల్ విలన్ పాత్ర పోషిస్తున్నాడు. కాబట్టి దానికి సమీపంలో ‘ఇండియన్-2’ను రిలీజ్ చేయడం కష్టం.

‘కల్కి’ మీద ఉన్న భారీ అంచనాల దృష్ట్యా కూడా ముందు వారం ‘ఇండియన్-2’ను రిలీజ్ చేయడానికి అవకాశం లేదు. జూన్ ఆరంభంలో సినిమాలకు అంతగా కలిసి రాదు. ఇక మిగిలిన ఆప్షన్ జూన్ 13న రిలీజ్ చేసుకోవడమే. నిజానికి అప్పుడే స్కూళ్లు, కాలేజీలు మొదలవుతాయి కాబట్టి ఆ హడావుడిలో సినిమాను విడుదల చేయడం కూడా అంత మంచిది కాదనే అభిప్రాయం ఉంది.

కానీ దానికే ఫిక్సవక తప్పేలా లేదు. జూన్ నెలాఖర్లో వస్తే సినిమాకు ప్లస్ అయ్యేది. రిలీజ్ గురించి ప్రకటించినపుడే డేట్ లాక్ చేసుకుని ఉంటే బాగుండేదేమో. అప్పుడు జస్ట్ జూన్ నెల అన్నారు. ఇప్పుడు నెలాఖరుకు ‘కల్కి’ ఫిక్స్ అయింది. దీంతో అంతగా అనుకూలంగా లేని డేట్‌ను ‘ఇండియన్-2’ కోసం ఓకే చేయాల్సి వస్తోంది. త్వరలోనే ఇండియన్-2 టీం అధికారికంగా ఈ తేదీని ప్రకటించబోతోందట.