సిద్ధు క్రేజుకిది నిదర్శనం

కొన్నేళ్లు వెనక్కి వెళ్తే.. సిద్ధు జొన్నలగడ్డ అనే హీరో ముఖం పరిచయం ఉన్నా తన పేరు అది అని కూడా చాలామందికి తెలియదు. అప్పటికే ‘గుంటూరు టాకీస్’ సహా చాలా సినిమాలు చేసినా.. తనకు వచ్చిన గుర్తింపు తక్కువే. కానీ ‘కృష్ణ అండ్ హిజ్ లీల’ అనే సినిమాతో అతను వేసిన ముద్ర బలమైంది. నటుడిగా, రచయితగా అతడి అసలు టాలెంట్ ఏంటో ఆ సినిమాతోనే చాలామందికి తెలిసింది.

ఐతే ఆ చిత్రం ఓటీటీలో విడుదల కావడంతో సిద్ధుకు ఒక మార్కెట్ అంటూ ఏమీ క్రియేట్ కాలేదు. థియేటర్లలో సినిమా హిట్టవడమే ఏ నటుడైనా కోరుకునేది. ఆ కోరికను ‘డీజే టిల్లు’ తీరుస్తుందని సిద్ధు ఆశించాడు. కానీ ఈ చిత్రం థియేటర్లలో జస్ట్ హిట్ కావడం కాదు.. బ్లాక్ బస్టర్ అయి కూర్చుంది. ఆ సినిమా అంత పెద్ద సక్సెస్ అవుతుందని.. ఆ సినిమా పాటలు, డైలాగులు అంతగా వైరల్ అవుతాయని సిద్ధు సైతం ఊహించి ఉండడేమో.

‘డీజే టిల్లు’తో వచ్చిన గుర్తింపుతో వచ్చిన అవకాశమల్లా వాడేసుకోకుండా ‘డీజే టిల్లు’ సీక్వెల్ చేయాలనుకోవడం సిద్ధు తీసుకున్న మంచి నిర్ణయం. దాని ఫలితం ఈ రోజు తెలుస్తోంది. ‘టిల్లు స్క్వేర్’పై జనాల్లో క్రేజ్ మామూలుగా లేదని అడ్వాన్స్ బుకింగ్స్‌తోనే అర్థమైంది. రెండు తెలుగు రాష్ట్రాల్లో మార్నింగ్ షోస్ ప్యాక్డ్ హౌస్‌లతో నడిచాయీ రోజు. హైదరాబాద్‌లో అయితే ఉదయం 7-7.30కే పలు థియేటర్లలో షోలు పడగా అవి అడ్వాన్స్ ఫుల్స్ అయ్యాయి.

ఈ షోల నుంచే కాక ఓవర్సీస్ ప్రిమియర్స్ నుంచి కూడా పాజిటివ్ టాక్ రావడంతో మార్నింగ్ షోలకు టికెట్లు దొరకడం కష్టమైపోయింది. సాయంత్రానికి మెజారిటీ థియేటర్లలో హౌస్ ఫుల్స్ బోర్డులు పెట్టడం గ్యారెంటీ. మొత్తానికి టిల్లు అనే పాత్రతో సిద్ధు దశ తిరిగినట్లే కనిపిస్తోంది. ‘డీజే టిల్లు’కు ముందు అతడికి స్టార్ ఇమేజ్ లేదు. కానీ ‘టిల్లు స్క్వేర్’ రన్ పూర్తయ్యేసరికి అతను నాని, విజయ్ దేవరకొండ, రామ్ లాంటి మిడ్ రేంజ్ స్టార్లున్న లీగ్‌లో అడుడు పెట్టే సంకేతాలు కనిపిస్తున్నాయి.