కెసిఆర్ రాహుల్ మధ్యలో హాయ్ నాన్న

హాయ్ నాన్న ప్రమోషన్ల విషయంలో నాని మాములు క్రియేటివిటీ చూపించడం లేదు. డిసెంబర్ 7 ఇంకో పదిహేడు రోజుల్లో రాబోతున్న నేపథ్యంలో ఒక్కసారిగా స్పీడ్ పెంచేశాడు. మొన్న తెలంగాణ ఎన్నికల సందర్భాన్ని పురస్కరించుకుని లోకేష్ ని అనుకరిస్తూ ఆపై కిరాణా కొట్టు కామెంట్ల మీద విరుచుకుపడిన వాళ్ళ మీద సెటైర్లు వేస్తూ మంచి కిక్ ఇచ్చాడు. ఇప్పుడు మరో వీడియో బైట్ తో అభిమానుల ముందుకొచ్చాడు. ఈసారి ఏకంగా మూడు నిమిషాల కంటెంట్ తో రావడం విశేషం. ఇలా హీరో ఒక్కడే సోలోగా చేయడం ఆ మధ్య నవీన్ పోలిశెట్టి తర్వాత నానినే చూస్తున్నాం.

ఇక అసలు విషయానికి వస్తే నాని అచ్చం సిఎం కెసిఆర్ ని అనుకరిస్తూ అదే స్లాంగ్, భాషలో డమ్మీ మీడియా అడిగిన ప్రశ్నలకు వెరైటీ సమాధానాలు ఇచ్చాడు. ముఖ్యంగా జర్నలిస్టు రాహుల్ ని ఉద్దేశించి ప్రత్యేకంగా కేసీఆర్ ఏదైతే తమాషా చేస్తారో దాన్నే ఇమిటేట్ చేశాడు. ఏందివయ్యా రాహుల్ అంటూ పదే పదే సంబోధిస్తూ కొన్ని కౌంటర్లు ఇచ్చాడు. హాయ్ నాన్న వాయిదా పడే ప్రసక్తే లేదని తేల్చేశాడు. బయట ఎవరెన్ని ప్రచారాలు చేసినా తగ్గదేలే అంటూ నొక్కి చెప్పాడు. ఇది యాక్షన్ సినిమా కాదని లవ్ ప్లస్ ఫ్యామిలీ ఎమోషన్ రెండూ ఉంటాయని తేల్చేశాడు.

రివ్యూల గురించి మాట్లాడుతూ సినిమాలు బాగుంటే ఆడతాయి లేదంటే పోతాయని ఓపెన్ గా అనడం బాగుంది. కాసిన్ని జోకులు, పంచులతో నాని పూర్తిగా వన్ మ్యాన్ షో చేశాడు. నిజానికి ఈ పబ్లిసిటీకి హాయ్ నాన్నలో ఉన్న కథకు సంబంధం లేదు. ఆడియన్స్ అటెన్షన్ ని వన్ సైడ్ చేసేందుకు చేస్తున్న ప్రయత్నమిది. డిసెంబర్ 8 వచ్చేందుకు ప్లాన్ చేసుకున్న నితిన్ ఎక్స్ ట్రాడినరి మ్యాన్ ప్రమోషన్ విషయంలో వెనుకబడి ఉంది. వరుణ్ తేజ్ ఆపరేషన్ వాలెంటైన్, గ్యాంగ్స్ అఫ్ గోదావరిలు వాయిదా ఉందో లేదో ఇంకా చెప్పలేదు. వీళ్ళ సంగతేమో కానీ నాని మాత్రం నేనొక్కడినే రేంజ్ లో చెలరేగిపోతున్నాడు.