వార్-2, బ్ర‌హ్మాస్త్ర‌-2 అప్‌డేట్స్ వ‌చ్చేశాయ్

జూనియ‌ర్ ఎన్టీఆర్ అభిమానుల దృష్టి ప్ర‌స్తుతం దేవ‌ర మీదే ఉన్న‌ప్ప‌టికీ.. యంగ్ టైగ‌ర్ త‌ర్వాత చేయ‌బోయే ప్రాజెక్టు విష‌యంలో వాళ్ల క్యూరియాసిటీ త‌క్కువ‌గా ఏమీ లేదు. ఆ చిత్రంతోనే తార‌క్ బాలీవుడ్‌లోకి అడుగు పెడుతున్నాడు. హృతిక్ రోష‌న్‌తో క‌లిసి తార‌క్ చేయ‌బోతున్న వార్-2 ఈ ఏడాది చివ‌ర్లోనే సెట్స్ మీదికి వెళ్తుంద‌నే అంచ‌నాలున్నాయి. ప్ర‌స్తుతం విరామం లేకుండా దేవ‌ర షూటింగ్‌లో పాల్గొంటున్నాడు తార‌క్.

ఇటీవ‌లే వార్-2 డైరెక్ట‌ర్ అయాన్ ముఖ‌ర్జీ హైద‌రాబాద్‌కు వ‌చ్చి తార‌క్‌తో స్క్రిప్టు, షెడ్యూళ్ల గురించి మాట్లాడి వెళ్లాడు. తాజాగా హీరో ర‌ణ‌బీర్ క‌పూర్ వార్-2 గురించి అప్‌డేట్ ఇవ్వ‌డం విశేషం. తాను అయాన్‌తో బ్ర‌హ్మాస్త్ర‌-2 కూడా చేయ‌బోతున్న విష‌యాన్ని ధ్రువీక‌రిస్తూ.. వార్-2 షూట్ గురించి మాట్లాడాడు ర‌ణ‌బీర్. ఈ సినిమా చిత్రీక‌ర‌ణ అతి త్వ‌ర‌లో మొద‌ల‌వుతుంద‌ని అత‌ను చెప్పాడు.

అంతే కాక వార్-2 షూటింగ్ వ‌చ్చే ఏడాది మూడో క్వార్ట‌ర్లోనే పూర్త‌యిపోతుంద‌ని అత‌ను సంకేతాలు ఇవ్వ‌డం విశేషం. బ్ర‌హ్మాస్త్ర‌-2 చిత్రాన్ని తాము వ‌చ్చే ఏడాది చివ‌ర్లో లేదా 2025 ఆరంభంలో మొద‌లుపెడ‌తామ‌ని ర‌ణ‌బీర్ వెల్ల‌డించాడు. బ్ర‌హ్మాస్త్ర-1 అనుకున్నంత మంచి ఫ‌లితాన్ని అందుకోని నేప‌థ్యంలో 2, 3 భాగాలు ఉండ‌క‌పోవ‌చ్చ‌నే చ‌ర్చ జ‌రిగింది. ఈ ప్ర‌చారానికి ర‌ణ‌బీర్ తెర‌దించాడు.

ఆల్రెడీ బ్ర‌హ్మాస్త్ర-2 స్క్రిప్టు వ‌ర్క్ న‌డుస్తోంద‌ని.. త‌న‌కు అయాన్ క‌థ కూడా వినిపించాడ‌ని చెప్పాడు. బ్ర‌హ్మాస్త్ర‌-1కు వ‌చ్చిన ఫీడ్ బ్యాక్ అంతా తాము తీసుకున్నామ‌ని.. అందులో దొర్లిన త‌ప్పుల‌ను స‌ర‌దిద్దుకుంటామ‌ని.. బ్ర‌హ్మాస్త్ర‌-2 అంచ‌నాల‌ను మించి ఉంటుంద‌ని అత‌ను ధీమా వ్య‌క్తం చేశాడు. బ్ర‌హ్మాస్త్ర‌-1తో పోలిస్తే ప‌దిరెట్లు భారీగా ఉంటుంద‌ని ర‌ణ‌బీర్ చెప్ప‌డం విశేషం. మొత్తానికి బ్ర‌హ్మాస్త్ర‌-2 విష‌యంలో సందేహాలేమీ అవ‌స‌రం లేద‌ని ర‌ణ‌బీర్ మాట‌ల్ని బ‌ట్టి అర్థ‌మైంది.