హృతిక్ తండ్రి మామూలోడు కాదు

త‌న కొడుకు హృతిక్ రోష‌న్.. క‌హోనా ప్యార్ హై అనే ఒకే ఒక్క సినిమాతో సూప‌ర్ స్టార్‌ను చేసేసిన ద‌ర్శ‌కుడు రాకేష్ రోష‌న్. హృతిక్ టాలెంట్, అత‌డి అందం ఈ సినిమాకు పెద్ద ప్ల‌స్ అయి అత‌ను స్టార్‌గా అవ‌త‌రించిన‌ప్ప‌టికీ.. అత‌డికి అదిరిపోయే డెబ్యూ ఇచ్చిన ఘ‌న‌త రాకేష్‌దే. ఆ త‌ర్వాత కూడా కొడుకుతో కోయీ మిల్ గ‌యా, క్రిష్‌, క్రిష్‌-3 లాంటి బ్లాక్‌బ‌స్ట‌ర్లు ఇచ్చాడు రాకేష్.

ఇండియాలో ఫ్రాంఛైజీ చిత్రాల ఒర‌వ‌డి పెర‌గ‌డంలో క్రిష్ సిరీస్‌ది చాలా కీల‌క పాత్ర‌. ఇండియాకంటూ చెప్పుకోవ‌డానికి సూప‌ర్ హీరో ఫ్రాంఛైజీ ఇదే. ఐతే క్రిష్‌-3 వ‌చ్చి ప‌దేళ్లు అవుతున్నా ఈ ఫ్రాంఛైజీలో కొత్త సినిమా రాలేదు. నాలుగైదేళ్ల ముందే దీని కోసం ప్లానింగ్ జ‌రిగింది కానీ.. హృతిక్ కుటుంబానికి అనుకోని క‌ష్టం రావ‌డంతో సినిమా వాయిదా వేయ‌క త‌ప్ప‌లేదు.

రాకేష్ రోష‌న్ కొన్నేళ్ల కింద‌ట క్యాన్స‌ర్ బారిన ప‌డ‌టంతో క్రిష్-4 ప‌ని ఆగిపోయింది. క్యాన్స‌ర్ లాంటి మ‌హ‌మ్మారి నుంచి కోలుకుని మామూలుగా బ‌త‌క‌డ‌మే క‌ష్టం. ఇక సినిమా తీయ‌డం, అందులోనూ క్రిష్-4 లాంటి మెగా మూవీ తీయ‌డం అంటే మాట‌లు కాదు. దీంతో ఈ సినిమా, ఈ ఫ్రాంఛైజీ ఇక ఉండ‌ద‌ని చాలామంది అనుకున్నారు. అందుకు త‌గ్గ‌ట్లే చాన్నాళ్లుగా దీని గురించి సౌండ్ లేదు. కాగా ఇటీవ‌ల క్రిష్‌-4 సినిమా ఉంటుంద‌ని, కానీ ద‌ర్శ‌కుడు వేర‌ని బాలీవుడ్ మీడియాలో ప్ర‌చారం జ‌రుగుతోంది.

హృతిక్‌తో బ్యాంగ్ బ్యాంగ్, వార్ సినిమాలు తీసి.. ఇటీవ‌లే వార్-2 సినిమాను అనౌన్స్ చేసిన సిద్దార్థ్ ఆనంద్ ఈ చిత్రానికి ద‌ర్శ‌క‌త్వం వ‌హిస్తాడ‌ని వార్త‌లు వ‌చ్చాయి. ఐతే హృతిక్ తండ్రి స్వ‌యంగా ఈ వార్త‌ల‌ను ఖండించాడు. ఇలాంటి ప్ర‌తిపాద‌నే లేద‌ని తేల్చేశాడు. త‌నే క్రిష్‌-4 సినిమా తీస్తాన‌ని.. స్క్రిప్టు అంతా ఓకే అనుకున్నాక ఈ సినిమాను ప్ర‌క‌టిస్తాన‌ని పేర్కొన్నాడు. వ‌య‌సు మీద ప‌డి, తీవ్ర అనారోగ్యం బారిన ప‌డ్డాక కూడా ఇంత పెద్ద సినిమా చేయాల‌న్న సంక‌ల్పంతో ఉన్నాడంటే రాకేష్ మామూలోడు కాదు.