మహేష్ ఆ టైటిల్ పెట్టే ఛాన్సే లేదు

సూపర్ స్టార్ మహేష్ బాబు కొత్త సినిమా టైటిల్ గురించి నెల రోజులుగా విపరీతమైన చర్చ జరుగుతోంది. ఈ సినిమాకు అమ్మపాట, భారతంలో అర్జునుడు.. లాంటి టైటిళ్లు ఇంతకుముందు ప్రచారంలోకి వచ్చాయి. ఈ టైటిళ్ల విషయంలో అభిమానుల నుంచి అంత సానుకూల స్పందన కనిపించలేదు. కొన్ని రోజుల హడావుడి తర్వాత ఈ చర్చ ఆగింది. కానీ ఇప్పుడు మళ్లీ ఈ సినిమా టైటిల్ గురించి పెద్ద డిస్కషన్ నడుస్తోంది.

త్రివిక్రమ్ దర్శకత్వంలో తెరకెక్కుతున్న ఈ చిత్రానికి ‘అమరావతికి అటు ఇటు’ అనే టైటిల్ పెట్టాలని చూస్తున్నారని.. కానీ తర్జన భర్జనలు నడుస్తున్నాయని అంటున్నారు. ఐతే లాజికల్‌గా ఆలోచిస్తే ఈ సినిమాకు ఈ టైటిల్ పెట్టే అవకాశాలు ఎంతమాత్రం లేవని అర్థమైపోతుంది.

అమరావతి అనగానే ఆంధ్రప్రదేశ్ రాజధాని వ్యవహారమే గుర్తుకొస్తుంది అందరికీ. దాని మీద నాలుగేళ్లుగా నడుస్తున్న పొలిటికల్ డ్రామా అంతా తెలిసిందే. వచ్చే ఎన్నికల్లో అదే ప్రధాన అంశంగా మారేలా కనిపిస్తోంది. అమరావతి వ్యవహారంలో జగన్ సర్కారు మూటగట్టుకున్న అప్రతిష్ట అంతా ఇంతా కాదు. ఇప్పుడు మహేష్ సినిమాకు ఏ ఉద్దేశంతో ‘అమరావతికి అటు ఇటు’ అనే టైటిల్ పెట్టినా.. అది రాజకీయ రంగు పులుముకుంటుంది.

రాజకీయంగా మహేష్ ఎంత న్యూట్రల్‌గా ఉంటాడో తెలిసిందే. ఏమాత్రం వివాదాల జోలికి వెళ్లడు. ఇప్పుడు ఇలాంటి టైటిల్ పెట్టి అనవసరంగా తన సినిమాకు రాజకీయ రంగు అంటించుకోవడానికి మహేష్ ఎంతమాత్రం ఇష్టపడడు. కాబట్టి త్రివిక్రమ్ ఈ టైటిల్ ఖరారు చేసే అవకాశాలు లేవని ఫిక్సయిపోవచ్చు. ఈ సినిమా టైటిల్ గ్లింప్స్‌ను శ్రీరామనవమికి లాంచ్ చేస్తారని అంటున్నారు.