Gulte Telugu Telugu Political and Movie News Updates
ఒక సినిమా అనుకోకుండా చాలా పెద్ద హిట్టయితే.. భారీ వసూళ్లు సాధిస్తే.. ట్రెండ్ సెట్ చేస్తే.. ఆ తర్వాత అలాంటి సినిమాలే రావడం మామూలే. కానీ ఇలాంటి సినిమాలను అనుకరిస్తూ చేసే ప్రయత్నాలు వర్కవుట్ కావడం కష్టం. ప్రేక్షకులు అప్పటికే అలాంటి సినిమా ఒకటి చూశాక.. దాన్ని అనుకరించే సినిమాను ఎందుకు ఆదరిస్తారు? ఈ చిన్న లాజిక్ తెలియకుండా కష్టపడిపోతుంటారు ఫిలిం మేకర్స్.
‘కేజీఎఫ్’ తర్వాత దాని బాటలో వివిధ ఇండస్ట్రీల్లో సినిమాలు తెరకెక్కుతున్నాయి. ఆల్రెడీ కన్నడలోనే ఉపేంద్ర హీరోగా ‘కబ్జ’ అనే సినిమా తీస్తున్నారు. దాని ట్రైలర్ చూస్తే ‘కేజీఎఫ్’ను మళ్లీ దించేస్తున్నట్లు అనిపించింది. ఇంకా రిలీజ్ కాని ఈ సినిమా మీద జనాల్లో ఏమంత మంచి ఒపీనియన్ లేదు. దాని ఫలితం ఏమవుతుందో కానీ.. ఇంతలో ‘మైకేల్’ అనే సినిమా వచ్చింది.
ట్రైలర్ చూస్తే ఏమీ ‘కేజీఎఫ్’ లాగా అనిపించలేదు కానీ.. సినిమా చూసిన వాళ్లకు ముందు ‘కేజీఎఫ్’యే కళ్ల ముందు కదలాడింది. ‘కేజీఎఫ్’ లాగే ఇది కూడా మూడు దశాబ్దాల ముందు నడిచే కథ. విజువల్స్ అంతా కూడా ‘కేజీఎఫ్’నే తలపిస్తాయి. ‘కేజీఎఫ్’లో మాదిరే ఇందులోనూ హీరో ఒక అనాథ. చిన్నపుడే తల్లిని కోల్పోతాడు. ఒక లక్ష్యంతో ముంబయిలో అడుగు పెడతాడు. అక్కడ విలన్ దగ్గర చేరి.. అంచెలంచెలుగా ఎదుగుతాడు. సినిమా అంతటా కూడా హీరో గురించి ఒక పాత్ర నరేట్ చేస్తూ.. అతడికి ఎలివేషన్ ఇస్తూ సాగుతుంది. అతను మాత్రమే కాదు.. వేరే పాత్రలు కూడా హీరో కనిపిస్తే చాలు అతను వీరుడు శూరుడు అంటూ ఎలివేషన్ ఇస్తుంటాయి.
హీరో కనిపించిన ప్రతిసారీ విపరీతమైన బిల్డప్.. ఎదురొచ్చిన ప్రతి ఒక్కరినీ అతను ఉతికి ఆరేస్తుంటాడు. బ్యాగ్రౌండ్ స్కోర్‌తోనూ హీరో పాత్రకు మామూలు ఎలివేషన్ ఇవ్వలేదు. కానీ ఏం లాభం? ఈ అదనపు హంగులు, అవసరానికి మించిన ఎలివేషన్లు తప్ప కథాకథనాల్లో, సన్నివేశాల్లో విషయం కొరవడింది. ‘కేజీఎఫ్’కు ఇదొక పేల్ ఇమిటేషన్ లాగా అనిపించి ప్రేక్షకులు నిట్టూరుస్తున్నారు.
