పొన్నియ‌న్ సెల్వ‌న్ రికార్డుల మోత‌

Ponniyen Selvan సినిమాను తమిళ ప్రేక్ష‌కులు మామూలుగా ఓన్ చేసుకోవ‌ట్లేదు. తమిళేత‌ర భాష‌ల్లో ఈ సినిమాను పూర్తిగా తిర‌స్క‌రించ‌గా.. త‌మిళంలో మాత్రం ఈ చిత్రాన్ని నెత్తిన పెట్టుకున్నారు. అది ఏ స్థాయిలో అంటే తొలి రోజు నుంచి ఈ సినిమా రికార్డుల మోత మోగిస్తూ సాగిపోతోంది.

త‌మిళంలో ఒక్కో బాక్సాఫీస్ రికార్డునూ పొన్నియ‌న్ సెల్వ‌న్ త‌న ఖాతాలో వేసుకుంటోంది. త‌మిళ‌నాట అత్యంత వేగంగా వంద కోట్ల వ‌సూళ్లు సాధించిన చిత్రం అదే. ఈ ఏడాది అత్య‌ధిక తొలి రోజు, తొలి వీకెండ్ వ‌సూళ్లు రాబ‌ట్టిన సినిమాగానూ పొన్నియ‌న్ సెల్వ‌న్ ఘ‌న‌త సాధించింది.

వ‌ర‌ల్డ్ వైడ్ ఈ సినిమా వ‌సూళ్లు ఇప్ప‌టికే రూ.300 కోట్లకు చేరుకోవ‌డం విశేషం. కాగా అందులో త‌మిళ వెర్ష‌న్ వాటానే 80 శాతానికి పైగా ఉంది. ఇప్ప‌టికే త‌మిళంలో బాహుబ‌లి క‌లెక్ష‌న్ల‌ను దాటేసిన పొన్నియ‌న్ సెల్వ‌న్.. త్వ‌ర‌లోనే విక్రమ్ వ‌సూళ్ల‌ను కూడా అధిగ‌మించ‌బోతోంది. ఫుల్ ర‌న్లో 2.0ను దాటి నంబ‌ర్ వ‌న్ త‌మిళ సినిమాగా నిలిచే అవ‌కాశాల‌ను కూడా కొట్టిపారేయ‌లేం.

విదేశాల్లో ఆల్రెడీ 2.0 వ‌సూళ్ల‌ను ఈ చిత్రం అధిగ‌మించేసింది. దాదాపుగా పొన్నియ‌న్ సెల్వ‌న్ రిలీజైన ప్ర‌తి దేశంలోనూ ఇది ఆల్ టైం నంబ‌ర్ వ‌న్ త‌మిళ సినిమాగా రికార్డు అందుకునే దిశ‌గా అడుగులు వేస్తోంది. విక్ర‌మ్ లాంటి బ్లాక్‌బ‌స్ట‌ర్ మూవీ సాధించిన వ‌సూళ్ల‌ను యుఎస్‌లో మూడు రోజుల్లోనే పొన్నియ‌న్ సెల్వ‌న్ దాటేయ‌డం విశేషం. అక్క‌డ ఈ సినిమా వ‌సూళ్లు 5 మిలియ‌న్ డాల‌ర్ల‌కు చేరువ‌గా ఉన్నాయి.

5.5 మిలియ‌న్ డాల‌ర్ల‌తో 2.0 నెల‌కొల్పిన రికార్డును పొన్నియ‌న్ సెల్వ‌న్ బ‌ద్ద‌లు కొట్ట‌డం లాంఛ‌న‌మే. ఈ సినిమా చూడ‌డాన్ని త‌మ బాధ్య‌త‌గా ఫీల‌వుతున్న‌ట్లున్నారు త‌మిళ ప్రేక్ష‌కులు. అక్క‌డ సాహిత్య చ‌రిత్ర‌లోనే అత్యంత ఆద‌ర‌ణ పొందిన పొన్నియ‌న్ సెల్వ‌న్ న‌వ‌ల ఆధారంగా మ‌ణిర‌త్నం ఈ సినిమాను రూపొందించాడు. మిగ‌తా భాష‌ల వాళ్లు తిర‌స్క‌రించిన‌ప్ప‌టికీ.. త‌మిళ వెర్ష‌న్ సాధించిన విజ‌యం రెండో భాగం తీయ‌డానికి మ‌ణి అండ్ టీంకు గొప్ప ప్రోత్సాహాన్నిచ్చేదే.