బ్ర‌హ్మాస్త్ర‌-2.. హీరో ఎవ‌రు?

మొత్తానికి బ్ర‌హ్మాస్త్ర అనేక అడ్డంకుల‌ను దాటి బాక్సాఫీస్ ప‌రీక్ష‌ను విజ‌య‌వంతంగా దాటేసేలాగే క‌నిపిస్తోంది. విడుద‌ల‌కు ముందు ఉన్న నెగెటివిటీ చూస్తే.. ఈ సినిమా క‌చ్చితంగా బోల్తా కొడుతుంద‌నే అనిపించింది. అందులోనూ ఈ చిత్రానికి మ‌రీ పాజిటివ్ టాక్ కూడా రాలేదు. కానీ సినిమా తొలి వారాంతంలో హౌస్ ఫుల్స్‌తో ర‌న్ అయింది. అంచ‌నాల‌కు మించి వ‌సూళ్లు రాబ‌ట్టింది.

తెలుగు రాష్ట్రాల వ‌ర‌కు ఈ చిత్రం ఆల్రెడీ లాభాల బాట ప‌ట్టింది. హిందీలో బ్రేక్ ఈవెన్ అవ్వాలంటే కొంచెం క‌ష్ట‌ప‌డాల్సిందే. కాక‌పోతే వ‌చ్చే రెండు వారాల్లో ఏ భారీ చిత్రం రాక‌పోవ‌డం దీనికి అడ్వాంటేజ్. మ‌రి ఫుల్ ర‌న్లో సినిమా స‌క్సెస్ ఫుల్ అనిపించుకుంటుందేమో చూడాలి. ఈ సంగ‌తి ప‌క్క‌న పెడితే బ్ర‌హ్మాస్త్ర చూసిన వాళ్లంద‌రికీ దీని సీక్వెల్ ప‌ట్ల ఆస‌క్తి నెల‌కొంది.

బ్ర‌హ్మాస్త్ర‌ను మూడు భాగాలుగా తీయ‌బోతున్న‌ట్లు ముందే ప్ర‌క‌టించారు. తొలి భాగానికి శివ‌ అని పేరు పెట్టారు. అది ర‌ణ‌బీర్ క‌పూర్ పాత్ర పేరు. పార్ట్-1లో క‌థ మొత్తం కూడా అత‌డి చుట్టూనే తిరుగుతుంది. పార్ట్-2 గురించి ఇందులోనే హింట్ ఇచ్చేశారు. దానికి టైటిల్.. దేవ్. సినిమాలో అది ర‌ణ‌బీర్ తండ్రి పాత్ర పేరు. ఆ పాత్ర‌ను గ్రాఫిక్స్ రూపంలో ఒక చిత్ర‌మైన ఆకారంలో చూపించారే త‌ప్ప‌.. ఆ వ్య‌క్తి ముఖం క‌నిపించ‌దు. దాన్ని స‌స్పెన్స్ లాగా దాచారు. సెకండ్ పార్ట్ మొత్తం అత‌డి క‌థే న‌డుస్తుంది. మ‌రి ఆ పాత్ర‌లో ఎవ‌రు న‌టిస్తార‌న్న‌ది ఇప్పుడు స‌స్పెన్స్‌గా మారింది.

ర‌ణ‌బీరే ఆ పాత్ర‌ను చేస్తే మొనాట‌నీ రావ‌చ్చు. సినిమాకు వైవిధ్యం చేకూర‌క‌పోవ‌చ్చు. కాబ‌ట్టి ఆ పాత్ర‌కు వేరే న‌టుడిని తీసుకునే అవ‌కాశ‌మే ఉంది. హృతిక్ రోష‌న్ లాంటివాడైతే భ‌లే ఉంటుంద‌న్న అభిప్రాయాలు వ్య‌క్త‌మ‌వుతున్నాయి. మ‌రి మేక‌ర్స్ ఆలోచ‌న ఏంటో చూడాలి.