అభిమాని కాళ్లు మొక్కిన సూపర్ స్టార్

కొవిడ్ తర్వాత బాలీవుడ్ పరిస్థితి దయనీయంగా మారిపోయింది. అక్కడ పెద్ద పెద్ద హీరోలు నటించిన భారీ చిత్రాలకు కూడా సరైన వసూళ్లు రావట్లేదు. ఓపెనింగ్స్ దారుణంగా ఉంటున్నాయి. ఓవరాల్ కలెక్షన్ల గురించి చెప్పాల్సిన పని లేదు. సినిమా టాక్‌తో సంబంధం లేకుండా అవి బాక్సాఫీస్ దగ్గర బోల్తా కొడుతున్నాయి. ఇటీవలే ఆమిర్ ఖాన్ సినిమా ‘లాల్ సింగ్ చడ్డా’, అక్షయ్ కుమార్ మూవీ ‘రక్షాబంధన్’లకు ఘోర పరాభవం ఎదురవడం తెలిసిందే.

ఇందులో ‘లాల్ సింగ్ చడ్డా’ను ఓ వర్గం అదే పనిగా టార్గెట్ చేసి దాన్ని దెబ్బ కొట్టింది. ఈ సినిమాను పొగిడాడని మరో స్టార్ హీరో హృతిక్ రోషన్‌న సైతం ఆ బ్యాచ్ లక్ష్యంగా చేసుకోవడం తెలిసిందే. దీంతో అతడి సినిమా ‘విక్రమ్ వేద’ ఇబ్బందుల్లో పడేలా కనిపిస్తోంది. ఈ నేపథ్యంలో అనవసరంగా వీళ్లను కెలికానే అని హృతిక్ ఫీలవుతుంటే ఆశ్చర్యమేమీ లేదు.

ఐతే కొత్తగా బాలీవుడ్ సినిమాల మీద పెరుగుతున్న వ్యతిరేకతను తగ్గించి, తమ ఇమేజ్‌ను మార్చుకునేందుకు, తాము అంత యారొగెంట్ కాదని రుజువు చేసుకునేందుకు కొందరు బాలీవుడ్ స్టార్లు ప్రయత్నిస్తుండగా.. హృతిక్ సైతం అదే బాటలో నడుస్తున్నట్లు కనిపిస్తోంది. తాజాగా అతను ఒక ప్రైవేటు ఈవెంట్లో పాల్గొన్నాడు. ఈ సందర్భంగా ఒక అభిమాని స్టేజ్ మీదికి వచ్చి హృతిక్ కాళ్లకు మొక్కాడు. దీంతో ఒకింత ఆశ్చర్యపోయిన హృతిక్.. వెంటనే అతడి కాళ్లకు ప్రతి నమస్కారం చేశాడు.

హృతిక్ చేసిన ఈ పనికి అక్కడున్న వాళ్లంతా అవాక్కయ్యారు. అంత పెద్ద స్టార్ అయి ఉండి అభిమాని కాళ్లకు మొక్కడాన్ని కొనియాడారు. ఈ వీడియో సోషల్ మీడియాలో వైరల్ అవడంతో నెటిజన్లు కూడా తన సింప్లిసిటీని పొగుడుతున్నారు. కానీ కొంతమంది మాత్రం ఇదంతా డ్యామేజ్ కంట్రోల్లో భాగమని, వచ్చే నెల 30న రిలీజయ్యే ‘విక్రమ్ వేద’ మీద నెగెటివిటీని తగ్గించడానికి హృతిక్ ఇలా చేసి ఉంటాడని అంటున్నారు.