చైతూ సినిమాను పట్టించుకుంటారా?

కొన్నేళ్ల ముందు వరకు ఇండియాలో ఆమిర్ ఖాన్ నంబర్ వన్ హీరో. కంటెంట్ పరంగా చూసినా, కలెక్షన్ల పరంగా చూసినా ఆయన్ని కొట్టేవాడు లేడు ఇండియాలో. ‘దంగల్’తో ఆల్ టైం హైయెస్ట్ గ్రాసర్ మూవీని అందించి మరోసారి తన ఆధిపత్యాన్ని చాటాడు. కానీ ‘బాహుబలి’ వచ్చాక కథ మారిపోయింది. ఇండియాలో సౌత్ సినిమాల ఆధిపత్యం మొదలైంది. అదే సమయంలో హిందీ చిత్రాల స్థాయి పడిపోతూ వచ్చింది. కరోనా తర్వాత అయితే బాలీవుడ్ పరిస్థితి దయనీయంగా మారింది. తమ సినిమాలను హిందీ ప్రేక్షకులే ఆదరించట్లేదు.

రకరకాల కారణాల వల్ల అక్కడ బాలీవుడ్ స్టార్ల పట్ల వ్యతిరేక భావం మొదలైంది. అదే సమయంలో సౌత్ సినిమాలను నెత్తిన పెట్టుకుంటున్నారు. గత కొన్ని నెలల్లో పుష్ప, ఆర్ఆర్ఆర్, కేజీఎఫ్-2 సినిమాలకు ఎలా బ్రహ్మరథం పట్టారో తెలిసిందే. ఇలాంటి టైంలో ఆమిర్ కొత్త చిత్రం ‘లాల్ సింగ్ చడ్డా’ రిలీజ్‌కు రెడీ అవుతోంది. ఈ చిత్రానికి ఏదీ కలిసి వస్తున్నట్లు కనిపించడం లేదు. ఓవైపు బాయ్‌కాట్ లాల్ సింగ్ చడ్డా అంటూ ఒక వర్గం సోషల్ మీడియాలో అదే పనిగా నెగెటివ్ ప్రచారం చేస్తోంది.

మరోవైపు బాలీవుడ్ సినిమాలకు బాక్సాఫీస్ దగ్గర అసలు కలిసి రావట్లేదు. దీనికి తోడు హాలీవుడ్ మూవీ ‘ఫారెస్ట్ గంప్’కు ఇది రీమేక్ కావడం వల్ల ప్రేక్షకుల్లో అంతగా ఎగ్జైట్మెంట్ కనిపించడం లేదు. అందులోనూ ఇలాంటి పాత్రనే ఆమిర్ ‘పీకే’లో చేయడం ప్రతికూలంగా కనిపిస్తోంది. ఇవన్నీ చాలవన్నట్లు దీనికి పోటీగా వస్తున్న ‘రక్షాబంధన్’కు మంచి బజ్ కనిపిస్తోంది. ఇలా హిందీలో అన్నీ ప్రతికూలంగా కనిపిస్తున్నాయి. ఇక నాగచైతన్య కీలక పాత్ర చేశాడు కాబట్టి తెలుగులో సినిమాకు మంచి స్పందన వస్తుందేమో అనుకుంటే.. అతను ఇటీవలే ‘థాంక్యూ’తో గట్టి ఎదురు దెబ్బ తిన్నాడు.

ఆమిర్ హిందీతో సమానంగా తెలుగులో ఈ చిత్రాన్ని ప్రమోట్ చేయడానికి గట్టిగా ప్రయత్నించాడు. ఒకటికి రెండుసార్లు సెలబ్రెటీలకు ప్రిమియర్స్ వేశాడు. అయినా కూడా అనుకున్నంత బజ్ కనిపించడం లేదు. ఈ వారం రిలీజైన బింబిసార, సీతారామం చిత్రాలకు  మంచి టాక్ వచ్చి అవి బాగా ఆడుతున్నాయి. రెండో వారం కూడా ఈ చిత్రం ప్రభావం చూపే పరిస్థితి కనిపిస్తోంది. ఇక వచ్చే వారం రానున్న ‘కార్తికేయ-2’, ‘మాచర్ల నియోజకవర్గం’ కూడా వాటి స్థాయిలో ప్రేక్షకుల దృష్టిని ఆకర్షిస్తున్నాయి. మరి ఇన్ని సినిమాల మధ్య చైతూ ప్రత్యేక పాత్ర చేసిన ‘లాల్ సింగ్ చడ్డా’ను ఏమాత్రం పట్టించుకుంటారన్నది సందేహం.