ప్లస్ అనుకుంటే మైనస్ అయ్యేలా ఉన్నాడే..

అక్కినేని నాగచైతన్య కెరీర్ ఒక అడుగు ముందుకేస్తే.. రెండడుగులు వెనక్కి పడ్డట్లు తయారైంది. పెద్ద బ్యాగ్రౌండ్ నుంచి వచ్చినప్పటికీ ఎంత ప్రయత్నించినా మాస్ ఇమేజ్ సంపాదించలేకపోయిన చైతూ.. చివరికి తనకు కలిసొచ్చిన లవ్ స్టోరీలతోనే విజయాలందుకుంటూ వచ్చాడు. కానీ అవి అతడి ఇమేజ్‌ను, మార్కెట్‌ను అనుకున్న స్థాయిలో పెంచలేకపోయాయి. సినిమా బాగుంటే ఓకే కానీ.. అటు ఇటు అయితే కలెక్షన్లు మరీ దారుణంగా ఉంటున్నాయి.

తాజాగా ‘థాంక్యూ’ సినిమాకు నెగెటివ్ టాక్ రావడంతో ఫుల్ రన్లో ఐదు కోట్ల షేర్ కూడా సాధించలేని దుస్థితి తలెత్తింది. ఈ రిజల్ట్ చైతూ బాక్సాఫీస్ సత్తా మీద అందరికీ సందేహాలు రేకెత్తించింది. ‘థాంక్యూ’ రిలీజైన మూడు వారాలకే అతను నటించిన మరో చిత్రం ‘లాల్ సింగ్ చద్దా’ విడుదల కానుండగా.. ఈ సినిమాకు చైతూ వల్ల ఏమాత్రం ప్రయోజనం ఉంటుందో అన్న అనుమానాలు వ్యక్తమవుతున్నాయి.

హాలీవుడ్ మూవీ ‘ఫారెస్ట్ గంప్’కు రీమేక్‌గా తెరకెక్కిన ఈ చిత్రంలో దాదాపు అరగంట కనిపించే కీలక పాత్రలో చైతూ నటించాడు. నిజానికి ఈ పాత్రకు ముందు అనుకున్నది తమిళ నటుడు విజయ్ సేతుపతిని. అతను కూడా ఓకే అన్నాడు. కానీ డేట్లు సర్దుబాటు కాకో, మరో కారణంతోనో అతను తప్పుకున్నాడు. తర్వాత ఈ పాత్రకు ఎవరు బాగా సెట్టవుతారా అని చూసి చైతూను ఎంచుకున్నారు. తెలుగు మార్కెట్లో చైతూ వల్ల మంచి ప్రయోజనం ఉంటుందని అనుకున్నారు.

కానీ ఇప్పుడు ‘థాంక్యూ’ ఫలితం చూశాక సినిమాకు చైతూ ప్లస్సా మైనస్సా అన్న ప్రశ్న తలెత్తుతోంది. సేతుపతిని పెట్టుకుని ఉంటే సౌత్ ప్రేక్షకులందరిలోనూ ప్రత్యేక ఆసక్తి ఉండేది. నటుడిగా అతడికున్న గుర్తింపు అలాంటిది. ఆమిర్ ఖాన్ సినిమాలో సేతుపతిని చూడటం ప్రత్యేకంగా అనిపించేది. ముఖ్యంగా తమిళంలో ఈ సినిమాకు మంచి క్రేజ్ వచ్చేది. తెలుగులో కూడా సేతుపతి నటన కోసం చూసే వాళ్లు చాలామందే ఉన్నారు. కానీ ఇప్పుడు దక్షిణాదిన మిగతా భాషల్లో చైతూ వల్ల ప్రయోజనం ఏ ప్రయోజనం లేకపోగా.. తెలుగులో అతను ఏమేర ప్రేక్షకులను ఈ సినిమా వైపు ఆకర్షించగలడో అన్న సందేహాలు కలుగుతున్నాయి.