చైతూ.. బెస్ట్ ప్లానింగ్!

నాగచైతన్య కెరీర్‌‌ గురించి మాట్లాడాల్సి వస్తే ‘మజిలీ’కి ముందు ‘మజిలీ’ తర్వాత అని డివైడ్ చేసి చూడాలి. ఎందుకంటే ఆ సినిమా వచ్చేవరకు చైతులోని నటుడు ఎలాంటివాడో పూర్తిగా తెలియలేదు. భగ్నప్రేమికుడిగా, ఇష్టం లేని అమ్మాయితో కాపురం చేయలేక నలిగిపోయే భర్తగా సెంటిమెంటు పండించి మెప్పించాడు. ఇక ఆ తర్వాత చైతు వెనక్కి తిరిగి చూసుకోలేదు. దానికి కారణం కచ్చితంగా అతని ప్లానింగే.     

చైతు సినిమాటోగ్రఫీ చూస్తే 100 పర్సెంట్ లవ్, ఏం మాయ చేశావె, మనం లాంటి ఏవో కొన్ని మంచి సినిమాలు మాత్రమే కనిపిస్తాయి. మిగతావన్నీ ఫ్లాపులే. వాటిలో ఆటోనగర్ సూర్య, దడ లాంటి డిజాస్టర్స్‌ కూడా ఎక్కువే. వీక్ స్టోరీస్‌ని సెలెక్ట్ చేసుకుని వరుస పరాయజయాలతో నలిగిపోయాడు చైతు. ఆ పీరియడ్‌ రిపీట్ కాకుండా ఉండటానికి ఇప్పుడు పర్‌‌ఫెక్ట్‌ ప్లానింగ్‌తో అడుగులు వేస్తున్నాడు.     

‘లవ్‌స్టోరీ’ సక్సెస్‌ తర్వాత మరింత జాగ్రత్త పడుతున్న చైతు.. విక్రమ్‌ కుమార్ డైరెక్షన్‌లో ‘థాంక్యూ’ మూవీ చేస్తున్నాడు. ఇదే డైరెక్టర్‌‌తో త్వరలో ఓ వెబ్ సిరీస్ కూడా చేయబోతున్నాడు. ఇది హారర్ కాన్సెప్ట్. బేసిగ్గా దెయ్యాల సినిమాలంటే చచ్చేంత భయం చైతూకి. కానీ కొత్తగా ఏదైనా చేయాలనే తపనతోనే ఈ సిరీస్‌కి ఓకే అన్నానని రీసెంట్‌ ఇంటర్వ్యూలో చెప్పాడు. అలాగే ఆమిర్‌‌ ఖాన్‌ ‘లాల్‌సింగ్ చద్ధా’లో కీలక పాత్రలో నటించాడు. దేశం కోసం ప్రాణాలిచ్చే సైనికుడిగా హార్ట్ టచింగ్ క్యారెక్టర్‌‌లో కనిపించబోతున్నాడు.     

ఇవి కాక పరశురామ్ డైరెక్షన్‌లోనూ ఓ మూవీకి సైలెంట్‌గా కమిటయ్యాడు. తాజా ఇంటర్వ్యూలో ఈ విషయాన్ని తను చెప్పేవరకు ఎవరికీ తెలీదు. ప్రస్తుతం మహేష్‌ బాబుతో ‘సర్కారువారి పాట’ తీసే పనిలో ఉన్నాడు పరశురామ్. అది పూర్తయ్యాక చైతు సినిమా స్టార్టవుతుందట. ఇక రేపు ‘బంగార్రాజు’గానూ ప్రేక్షకుల ముందుకొస్తున్నాడు. తన లైనప్ చూస్తుంటేనే వెరైటీ వైపు అడుగులు వేస్తున్నాడని అర్థమైపోతోంది. జానర్స్‌ మారుస్తున్నాడు. ఆ జానర్స్లో ఎక్స్పర్ట్స్‌ అయిన దర్శకులతో పని చేయడానికి సిద్ధమవుతున్నాడు. తన ప్లానింగ్ కనుక ఇలాగే కొనసాగితే ఇక చైతూకి తిరుగు లేనట్టే.