సంక్రాంతి రేసు నుంచి ఇంకోటి ఔట్?

సంక్రాంతికి సందడి చేయాల్సిన భారీ చిత్రాలు ఆర్ఆర్ఆర్, రాధేశ్యామ్ వాయిదా పడగానే వరుసబెట్టి చాలా చిన్న సినిమాలు పండుగ రేసులోకి వచ్చేశాయి. ఆల్రెడీ పండక్కి షెడ్యూల్ అయిన ‘బంగార్రాజు’ కాకుండా అరడజనుకు పైగానే సినిమాలు పోటీకి సై అనడం విశేషం. ఐతే ముందు వెనుక చూసుకోకుండా డేట్లయితే ఇచ్చారు కానీ.. ఇంత తక్కువ సమయంలో సినిమాను సరిగ్గా ప్రమోట్ చేసి బజ్ క్రియేట్ చేయడం, చాలినంత స్థాయిలో థియేటర్లు దక్కించుకుని సినిమా రిలీజ్ చేయడం, ఈ పోటీ మధ్య సక్సెస్ సాధించడం అంత తేలిక కాదని నెమ్మదిగా అర్థమైనట్లుంది.

అందుకే రేసులోంచి ఒక్కో సినిమా తప్పుకోవడం మొదలైంది. పోటీలోకి వచ్చినట్లే వచ్చి సామాన్యుడు, శేఖర్, 7 డేస్ 6 నైట్స్, ఉనికి లాంటి చిత్రాలు తప్పుకున్నాయి. ఆ తర్వాత కళ్యాణ్ దేవ్ మూవీ ‘సూపర్ మచ్చి’ కూడా పక్కకు వెళ్లిపోయింది. చివరికి సంక్రాంతి బంగార్రాజు, డీజే టిల్లు, హీరో, రౌడీ బాయ్స్ మధ్యనే పోటీ అనుకున్నారు. కానీ ఇప్పుడీ మూడు సినిమాల్లోనూ ఒకటి రేసు నుంచి వైదొలగినట్లు  వార్తలొస్తున్నాయి.

ఆ ఆ చిత్రమే.. డీజే టిల్లు. ఈ చిత్రాన్ని ‘బంగార్రాజు’, ‘రౌడీ బాయ్స్’కు పోటీగా జనవరి 14న విడుదల చేయాలని అనుకున్నారు. ఈ మేరకే ప్రమోషన్లు కూడా చేశారు. కానీ తాజా సమాచారం ప్రకారం ఈ చిత్రం సంక్రాంతి పోటీ నుంచి తప్పుకుందట. థియేటర్ల సమస్య తలెత్తిందా.. లేక ఈ పోటీ మధ్య రావడం మంచిది కాదనిపించిందా.. లేక కరోనాకు భయపడ్డారా అన్నది తెలియదు కానీ.. సినిమా అయితే పండక్కి రావట్లేదని అంటున్నారు.

పరిస్థితులను బట్టి జనవరి 26న రిలీజ్ చేయడం.. లేదా నిరవధికంగా వాయిదా వేయడం.. లేదా ఓటీటీ బాట పట్టడం.. ఈ మూడు ఆప్షన్లనూ చిత్ర బృందం పరిశీలిస్తోందట. కాబట్టి చివరికి సంక్రాంతి బరిలో మూడు సినిమాలే నిలవబోతున్నాయన్నమాట. బంగార్రాజు, రౌడీ బాయ్స్ 14న వస్తే.. తర్వాతి రోజు ‘హీరో’ థియేటర్లలోకి దిగుతుంది. ఆయా సినిమాలపై ఉన్న అంచనాల్ని బట్టి చూస్తే ‘బంగార్రాజు’కు ఎదురే ఉండేలా కనిపించట్లేదు.