బోయ‌పాటికి గుడి క‌ట్టేస్తారేమో..

ఎంత పెద్ద ద‌ర్శ‌కుడికైనా ప్ర‌తిసారీ అంచ‌నాల‌ను అందుకోవ‌డం అంటే అంత సులువు కాదు. అందులోనూ ఓ సినిమా మొద‌ల‌వ‌డంతోనే అంచ‌నాలు నెల‌కొని.. రిలీజ్ ద‌గ్గ‌రికి వ‌చ్చేస‌రికి అవి కొన్ని రెట్లు  పెరిగిపోతే అప్పుడు ఆశ‌ల్ని నిల‌బెట్ట‌డం చాలా క‌ష్ట‌మే అవుతుంది. కానీ బోయ‌పాటి శ్రీను మాత్రం అభిమానుల ఆకాంక్ష‌ల‌ను నిల‌బెట్టాడు. బాల‌య్య‌తో ఇప్ప‌టికే సింహా, లెజెండ్ లాంటి బ్లాక్‌బ‌స్ట‌ర్లు ఇచ్చిన బోయ‌పాటి.. అఖండ‌తోనూ హ్యాట్రిక్ కొట్టిన‌ట్లే క‌నిపిస్తున్నాడు.

కామన్ ఆడియ‌న్స్ నుంచి ఈ సినిమాకు మిశ్ర‌మ స్పంద‌న వ‌చ్చినా స‌రే.. అభిమానుల‌కు మాత్రం అఖండ ఒక పండుగ లాగే ఉంది. బాల‌య్య‌ను ఎలా చూడాల‌నుకుంటారో అలా.. ఫుల్ ఎన‌ర్జీతో చూపించ‌డం.. బోయ‌పాటితో సినిమా అనేస‌రికి వేరే లెవెల్లో పెర్ఫామ్ చేసే బాల‌య్య కూడా అఖండ పాత్ర‌లో విజృంభించ‌డంతో థియేట‌ర్ల‌లో అభిమానుల‌కు పూన‌కాలు వ‌చ్చేస్తున్నాయి.

స‌మీక్ష‌కులు ఏమ‌న్నా.. నాన్ ఫ్యాన్స్ ఎలాంటి కామెంట్లు చేసినా.. అభిమానులు మాత్రం అఖండ విష‌యంలో మామూలు ఆనందంలో లేరు. మ‌ళ్లీ మ‌ళ్లీ షోలు రిపీట్ చేస్తున్నారు. థియేట‌ర్ల‌లో వాళ్ల సంబ‌రాలు మామూలుగా లేవు. రూల‌ర్ సినిమా చూసి బాల‌య్య ప‌నైపోయింద‌న్న వాళ్లంతా.. ఇప్పుడు థియేట‌ర్ల‌లో ఆ హంగామా చూసి, సినిమాకు వ‌స్తున్న ఓపెనింగ్స్ చూసి నోరెళ్ల‌బెడుతున్నారు. ఇదంతా క‌చ్చితంగా బోయ‌పాటి మ‌హిమే అన‌డంలో సందేహం లేదు.

బోయ‌పాటితో బాల‌య్య సినిమా అన‌గానే ఆటోమేటిగ్గా హైప్ వ‌చ్చేసింది. ప్రోమోలతో ఆ హైప్‌ను ఇంకా ఇంకా పెంచ‌డంలో బోయ‌పాటి విజ‌య‌వంతం అయ్యాడు. ఇక సినిమా అంత‌టా మాస్ మూమెంట్స్, ఎలివేష‌న్లు, అదిరిపోయే యాక్ష‌న్ బ్లాక్స్ ఉండ‌టంతో అభిమానులు, మాస్ ప్రేక్ష‌కులు సినిమాకు బ్ర‌హ్మ‌రథం ప‌డుతున్నారు. త‌మ న‌మ్మ‌కాన్ని నిల‌బెడుతూ.. మ‌ళ్లీ బాల‌య్య కెరీర్‌కు మంచి ఊపు ఇచ్చిన బోయ‌పాటిపై బాల‌య్య అభిమానుల అభిమానం అంతా ఇంతా కాదు. వాళ్లు ఆయ‌న‌కు త‌మ గుండెల్లో ఎప్పుడో గుడి క‌ట్టేశారు. బ‌య‌ట కూడా అదే ప‌ని చేస్తారేమో అన్న‌ట్లుంది ప‌రిస్థితి.