ప్రేమలు వాడుకుంది… బెత్లెహం మిస్సయ్యింది

తెలుగు ప్రేక్షకులకు ఎప్పుడూ భాషా భేదం లేదు. కంటెంట్ బాగుంటే చాలు కన్నడ, తమిళ, మలయాళం, ఇంగ్లీష్ అనే తేడాలు పెట్టుకోరు. కలెక్షన్లు కురిపిస్తారు. కాకపోతే దాన్ని సరిగా వాడుకునే ప్లానింగ్, మార్కెటింగ్ తెలివి తేటలు ఉండాలి. గతంలో ప్రేమలు ఏపీ తెలంగాణలో ఎంత విజయం సాధించిందో తెలిసిందే. ప్రమోషన్లతో మొదలుపెట్టి డైలాగులు ఆదిత్య హాసన్ తో రాయించడం వరకు ప్రతి విషయంలో తీసుకున్న శ్రద్ధ కమర్షియల్ గా గొప్ప ఫలితాన్ని ఇచ్చి సూపర్ హిట్ ముద్ర వేయించుకుంది.

తాజాగా విడుదలైన బెత్లెహాం కుటుంబ యూనిట్ అలాంటి అవకాశాన్ని పూర్తిగా వాడుకోలేకపోతున్న వైనం కళ్ళముందు కనిపిస్తోంది. రెండు వారాలు ఆలస్యంగా విడుదల కావడం ఒక పొరపాటు అయితే దానికి సరైన పబ్లిసిటీ చేయకపోవడంతో అధిక శాతం జనాలకు చేరడం లేదు. తక్కువ షోలు ఉన్నా సరే హౌస్ ఫుల్స్ అవుతున్న వైనం బుక్ మై షోలో గమనించవచ్చు. స్ట్రెయిట్ మూవీ రంభ ఊర్వశి మేనక కన్నా వేగంగా బెత్లెహాం కుటుంబ యూనిట్ ఫుల్స్ కావడం గమనించాల్సిన విషయం.

తక్కువ ఓటిటి విండో వల్ల తెలుగు వెర్షన్ కు షోలు ఇచ్చేందుకు మల్టీప్లెక్సులు విముఖత చూపించడం మొదటి రోజు బుకింగ్స్ మీద ప్రభావం చూపించింది. తర్వాత సర్దుబాటు చేశారు కానీ షోలు సరిపోవడం లేదు. టైటిల్ మన నేటివిటీకి అనుగుణంగా లేకపోయినా బాగుందనే టాక్, సోషల్ మీడియా సపోర్ట్ చూసి మన ఆడియన్స్ థియేటర్స్ కు వెళ్లిపోతున్నారు. మీర్జాపూర్ తో పోటీగా హైదరాబాద్ లాంటి మెయిన్ సెంటర్స్ లో బెత్లెహాం కుటుంబ యూనిట్ బాగా పెర్ఫార్మ్ చేయడం విశేషం.

మేకర్స్ ఒకటి గుర్తించాలి. ఎంత డబ్బింగ్ సినిమా అయినా సరే ఒకవేళ దాన్ని తెలుగు జనాలకు అందించాలని అనుకుంటే మాత్రం వీలైనంత త్వరగా ఆ ప్రక్రియ చేపట్టాలి. లేదా సమాంతరంగా ఒరిజినల్ వెర్షన్ తో పాటు రిలీజ్ చేయాలి. హిట్టు ఫట్టు ప్రతిసారి మన చేతుల్లో ఉండవు కాబట్టి పాజిటివ్ అనుకుని చేసుకుంటూ పోవడమే. ఒకవేళ కనీసం ఒక వారం ముందు ఇదే సినిమా వచ్చి తగిన పబ్లిసిటీకి కనక నోచుకుని ఉంటే ఇంకా పెద్ద సక్సెస్ అయ్యేది. టాక్సిక్ వల్ల ఛాన్స్ మిస్సయ్యింది.