టాక్సిక్ పరిస్థితి ఎలా ఉంది గురూ

భారీ అంచనాల మధ్య కెజిఎఫ్ ని మించి ఉంటుందని అభిమానులు గంపెడాశలు పెట్టుకున్న టాక్సిక్ రిలీజ్ రోజు ఉదయం నుంచే విమర్శల పర్వంలో మునిగి తేలుతోంది. మొదటి వీకెండ్ ఎన్నో ఆశలు పెట్టుకున్న ఎగ్జిబిటర్లకు నిరాశ మిగులుస్తూ అంతంత మాత్రం ఆక్యుపెన్సీలతో భారంగా నెట్టుకొస్తోంది. కనీసం యావరేజ్ టాక్ వచ్చినా ఏదోలా యష్ నెట్టుకొచ్చేవాడు కానీ మరీ ఇంత తీవ్రమైన నెగటివ్ టాక్ తో ఎదురీదలేక టీమ్ పోస్ట్ రిలీజ్ ప్రమోషన్లు సైతం ఆపేసింది.

వసూళ్ల నెంబర్లు, లాభ నష్టాలు అనుకున్న దానికన్నా ముందుగానే తేలేలా ఉన్నాయి. రెండో వారంలో మొక్కుబడి కొనసాగింపు తప్పించి హోల్డ్ చేయడం కష్టమని ట్రేడ్ స్పష్టం చేస్తోంది. కర్ణాటకలో కొంచెం బెటర్ గా ఉండగా, హిందీ ఆడియన్స్ మద్దతు మొదటి రెండు మూడు రోజులు దక్కడం దారుణమైన అంకెలు రాకుండా కాపాడింది. అయితే అది చాలడం లేదు. వారాంతం వచ్చేలోపే ఉత్తరాది రాష్ట్రాల్లో కూడా డ్రాప్ ఎక్కువగా ఉండటంతో డిస్ట్రిబ్యూటర్లు ఆందోళన చెందుతున్నారు.

మూడు గంటల పదిహేను నిమిషాల కంటెంట్ లో కనీసం ఒక ముప్పై నలభై శాతం బాగున్నా ఇంత నెగటివిటీ వచ్చేది కాదేమో. దర్శకురాలు గీతూ మోహన్ దాస్, యష్ కలిసి తయారు చేసిన స్క్రిప్ట్ కనీసం ఫ్యాన్స్ అంచనాలను సైతం మ్యాచ్ చేయలేకపోతోంది. టాక్సిక్ మీద వచ్చిన ప్రతికూల ప్రచారానికి అడ్డుకట్ట వేసేందుకు కన్నడ స్టార్లు ట్విట్టర్ లో నడుం బిగించారు. ఉపేంద్ర, రిషబ్ శెట్టి, ఇడియట్ హీరోయిన్ రక్షిత్ మొదలైనవాళ్ళు యష్ సపోర్ట్ గా పోస్టులు పెడుతున్నారు.

వీటి వల్ల ప్రయోజనం అంతగా ఉంటుందని చెప్పలేం. జనాలకు ఆల్రెడీ తీర్పు స్పష్టంగా అర్థమైపోయాక ఎందుకు బాలేదో తెలుసుకునేందుకు టికెట్లు కొనరు. ఇంకో విచిత్రం ఏమిటంటే తెలుగు యువత కావాలనే డిజాస్టర్ టాక్ ప్రచారం చేస్తోందని, ఇకపై మేము కూడా టాలీవుడ్ సినిమాలను చూడమని కొందరు కన్నడ నెటిజెన్లు కామెడీ చేస్తున్నారు. అయినా బెంగళూరులో టాక్సిక్ కన్నా ఇరుముడి బుకింగ్సే బాగున్నాయి. విభేదాలు ఎన్ని ఉన్నా ఫైనల్ గా మాట్లాడాల్సింది కంటెంట్ ఒక్కటే.