కొత్త కుర్రాడి మీద కామెంట్స్ ఏంటి

భారీ అంచనాలు కాదు కానీ ఘట్టమనేని ఫ్యామిలీ కావడంతో జయకృష్ణ డెబ్యూ మూవీ శ్రీనివాస మంగాపురం మీద ఆడియన్స్ లో ఓ మోస్తరు అంచనాలు ఉన్నాయి. కృష్ణ, మహేష్ బాబు ఫ్యాన్స్ ఈ మూవీని ప్రమోట్ చేసే బాధ్యత భుజాన వేసుకోవడంతో మెయిన్ సెంటర్స్ లో ఉదయం షోలు దాదాపుగా ఫుల్స్ పడ్డాయి. ప్రీ రిలీజ్ ఈవెంట్ కి మహేష్ ని తీసుకురావాలనే ప్రయత్నాలు వర్కౌట్ కాకపోవడం సోషల్ మీడియాలో పెద్ద చర్చకే దారి తీసింది. కొంత విసుర్లు కూడా వినిపించాయి.

ఇక అసలు పాయింట్ కు వస్తే శ్రీనివాస మంగాపురంకి సామాన్య ప్రేక్షకుల మద్దతు ఏ మేరకు దక్కనుందో ఈ వీకెండ్ కంతా క్లారిటీ వస్తుంది. జయకృష్ణ విషయం చూస్తే కుర్రాడు మరీ లేతగా ఉన్నప్పటికీ నటనలో ఓ మోస్తరుగా కష్టపడిన వైనం డాన్సులు, ఎక్స్ ప్రెషన్లలో కనిపించింది. అయితే భావోద్వేగాలు డిమాండ్ చేసే సీన్లతో పాటు ఇంటెన్సిటీ చూపించాల్సిన సన్నివేశాల్లో మెరుగుపడేందుకు చాలా హోమ్ వర్క్ చేయాలి. ఒక్క మూవీతో అంతా వచ్చేయదు.

హీరోల తొలి సినిమాలు దాదాపు ఇదే తరహాలోనే స్పందన తెచ్చుకుంటాయి. నాగార్జున విక్రమ్ నుంచి రామ్ చరణ్ చిరుత దాకా మిశ్రమ స్పందన సహజంగా కనిపిస్తూనే ఉంటుంది. జయకృష్ణ దానికి మినహాయింపు కాదు. అయితే దర్శకుడు అజయ్ భూపతి నుంచి ఏదైనా సిగ్నేచర్ ట్విస్టు లేదా డిఫరెంట్ స్క్రీన్ ప్లే ఆశించిన ఆడియన్స్ మాత్రం ఈ విషయంలో కొంత నిరాశ చెందారు. ఎందుకంటే ఆయన ఎంచుకున్నది రెగ్యులర్ కమర్షియల్ లవ్ స్టోరీ కాబట్టి.

జయకృష్ణ నెక్స్ట్ వేయబోయే అడుగులు తనకు ఎలాంటి ఆఫర్స్ వస్తాయనే దాని మీద ఆధారపడి ఉంటుంది. ఎందుకంటే సరైన ప్లానింగ్ లేకపోతే కుటుంబం బ్యాక్ గ్రౌండ్ ఎంత బలంగా ఉన్నా నిలదొక్కుకోవడం కష్టం. తొలినాళ్ళతో సుమంత్ మంచి సక్సెస్ లు సాధించినప్పటికీ తర్వాత చేసిన పొరపాట్ల వల్ల స్టార్ కాలేకపోయాడు. ఘట్టమనేని ఫ్యామిలీ నుంచి తర్వాత వచ్చేవాళ్లలో గౌతమ్ ఉన్నాడు. తన ఎంట్రీ కన్నా ముందే జయకృష్ణ సెటిలైపోతే ఫ్యాన్స్ హమ్మయ్య అనుకుంటారు.