పోలీస్ కమిషనరేట్ గా రాజమండ్రి!

రాజమహేంద్రవరం (రాజమండ్రి) ఉభయ గోదావరి జిల్లాలకు కీలక నగరం ఇది. విద్య, వ్యాపారం, రవాణా, పర్యాటకం, పరిపాలనా పరంగా ఈ నగరం ఎప్పుడూ బిజీగా ఉంటుంది. నిత్యం వేలాది మంది వచ్చి పోయే ఈ నగరానికి ప్రస్తుతం ఎస్పీ కార్యాలయం మాత్రమే ఉంది. గతంతో పోలిస్తే నగర జనాభాతో పాటు ప్రతిరోజు నగరానికి వచ్చి పోయేవారి సంఖ్య పెరిగింది. అయితే, ఎప్పుడైనా భద్రతాపరమైన నిర్ణయాలు తీసుకోవాలన్నా, నగరంలో ఏదైనా నిషేధాజ్ఞలు విధించాల్సి వచ్చినా రెవెన్యూ శాఖ ఉన్నతాధికారులు నిర్ణయం తీసుకుంటూ ఉండేవారు.

అయితే, కొన్ని సార్లు ఈ నిర్ణయాలు తీసుకోవడంలో జాప్యం జరుగుతోంది. ఇకపై, అటువంటి సమస్య లేకుండా భవిష్యత్ అవసరాలను దృష్టిలో ఉంచుకొని ఏపీ ప్రభుత్వం చరిత్రాత్మక నిర్ణయం తీసుకుంది. రాజమండ్రిలో పోలీస్ కమిషనరేట్ ఏర్పాటు చేస్తూ ప్రభుత్వం జీవో ఎంస్ నం.198 జారీ చేసింది. ఇప్పటి దాకా ఎస్పీ ఆఫీసు మాత్రమే ఉన్న రాజమహేంద్రవరంలో ఇకపై పోలీస్ కమిషనరేట్ రానుంది. ఇకపై, విజయవాడ, విశాఖ నగరాల మాదిరిగా రాజమండ్రికి కూడా పోలీస్ కమిషనర్ రాబోతున్నారు.

అయితే, కొత్తగా పోలీస్ కమిషరేట్ వస్తున్నప్పటికీ ప్రభుత్వం మాత్రం దానికి బడ్జెట్ ఏమీ కేటాయించలేదు. పోలీస్ కమిషనర్ గా డీఐజీ లేదా ఐజీ స్థాయి అధికారిని నియమించనున్నారు. తూ.గో జిల్లా పరిధిని మూడు ప్రాదేశిక జోన్లుగా విభజించబోతున్నారు. అయితే, కమిషనరేట్ లో కొత్త పోస్టులు క్రియేట్ చేయకుండా ఉన్న వారితో సర్దుబాటు చేస్తున్నారు. టెక్నికల్ సర్వీసెస్ డీఐజీ పోస్టును రాజమండ్రి కమిషనర్ పోస్టుగా మార్చారు. ఆల్రెడీ ఎస్పీలుగా పనిచేస్తున్న వారిని డీసీపీలుగా మార్చారు.