చంద్రబాబు, పవన్ భేటీలో సీట్లు ఖరారయ్యాయా…?

మరికొన్ని రోజుల్లో స్థానిక ఎన్నికలు జరగనున్నాయి. కోర్టు చిక్కులను పరిష్కరించుకొని ఈ ఏడాది చివరికల్లా లోకల్ ఎన్నికలు పూర్తి చేయాలని కూటమి ప్రభుత్వం భావిస్తుంది. అయితే ఈ ఎన్నికల్లో ఎవరెన్ని స్థానాల్లో పోటీ చేయాలన్న దానిమీద కూటమి పార్టీలు ఇంకా ఒక నిర్ణయానికి రాలేదు. మీడియాలో మాత్రం రకరకాలుగా ప్రచారం జరుగుతుంది. టీడీపీ 80 శాతం, జనసేన, బీజేపీ 20 శాతం సీట్లలో పోటీ చేయాలని నిర్ణయించినట్లు మంత్రి లోకేష్ చెప్పారని ఒక వర్గం ప్రచారం చేయడం తెలిసిందే. అదంతా ఒట్టి పుకార్లే అని ఖండించిన కూటమి నాయకులు ఇప్పుడు చర్చలు ప్రారంభించారు.

స్థానిక సమరానికి కూటమి సిద్ధమవుతున్న వేళ ముఖ్యమంత్రి చంద్రబాబు, ఉప ముఖ్యమంత్రి పవన్ కళ్యాణ్ మధ్య అమరావతిలో భేటీ జరిగింది. టీడీపీ, జనసేన, బీజేపీ నేతలు ఇప్పటికే అనేకమార్లు సమావేశమై సమన్వయంపై చర్చలు జరిపిన నేపథ్యంలో అగ్రనేతల మధ్య జరిగిన సమావేశానికి ప్రాధాన్యత సంతరించుకుంది. ఈ సమావేశంలో స్థానిక సంస్థల్లో ఎవరు ఎన్ని సీట్లలో ఎక్కడెక్కడ నుంచి పోటీ చేయాలన్న అంశంతో పాటు సీట్ల సర్దుబాటు, కూటమి బలాబలాలు, క్షేత్రస్థాయి నాయకులు, కార్యకర్తల మధ్య సమన్వయంపై చర్చ జరిగినట్లు తెలుస్తోంది.

అయితే స్థానిక ఎన్నికల ప్రస్తావన వచ్చినప్పుడల్లా ఉప ముఖ్యమంత్రి పవన్ కళ్యాణ్ గత అసెంబ్లీ ఎన్నికలలో జరిగిన సీట్ల షేరింగ్ ఇప్పుడు కుదరదని ఖరా ఖండిగా చెబుతూ వస్తున్నారు. ఈరోజు భేటీలో కూడా అదే విషయం ప్రస్థావించినట్లు ప్రచారం జరుగుతుంది. ఎవరికి బలమున్న చోట వారు పోటీ చేయాలన్న ప్రతిపాదన చేసినట్లు సమాచారం. ఇది ఎంతవరకు సాధ్యమౌతుందో తెలియదు. కానీ టీడీపీ 75 శాతం, జనసేన, బీజేపీ 25 శాతం సీట్లలో పోటీ చేసేలా ఒప్పందం జరిగినట్లు సోషల్ మీడియాలో ప్రచారం జరుగుతుంది.

జనసేన కార్యకర్తలు మాత్రం అనేక డిమాండ్లు చేస్తున్నారు. జనసేనకు ఐదు మేయర్ స్థానాలు కేటాయించడానికి ఇరువురు నాయకులు ఒక ఒప్పందానికి వచ్చినట్లు ప్రచారం చేస్తున్నారు. కాకినాడ, మచిలీపట్నం, విజయవాడ, ఒంగోలు, తిరుపతి స్థానాలు జనసేనకు కేటాయించేందుకుసీఎం చంద్రబాబు అంగీకరించినట్లు వాట్సాప్ గ్రూపుల్లో ఫార్వార్డ్ చేస్తున్నారు. అయితే ఈరోజు తొలి దశ చర్చలు మాత్రమే జరిగాయని, తుది నిర్ణయం ఏదీ తీసుకోలేదని అధికారికంగా తెలుస్తుంది.