విజయ్ సినిమా బాలయ్యకి బూస్ట్ ఇచ్చింది

కొన్ని సినిమాలు రిలీజ్ టైంలో సరిగా ఆడవు. కానీ తర్వాతి కాలంలో కల్ట్ స్టేటస్ తెచ్చుకుంటాయి. ఇలాంటి పేరు చాలా వరకు క్లాస్ చిత్రాలకే వస్తుంటుంది. కానీ మాస్ సినిమాలు కాల క్రమంలో కల్ట్ స్టేటస్ తెచ్చుకోవడం అరుదు. పైగా ఒక సినిమా తాలూకు రీమేక్ మూవీ బాలేకపోవడం వల్ల దాని ఒరిజినల్ స్థాయి పెరిగి, కల్ట్ స్టేటస్ రావడం ఇంకా చిత్రం. ‘భగవంత్ కేసరి’ చిత్రం విషయంలో ఇదే జరుగుతోంది.

2023 దసరా కానుకగా విడుదలైన బాలయ్య సినిమా బాగానే ఆడింది.
కానీ దర్శకుడు అనిల్ రావిపూడి కెరీర్లోనే ది బెస్ట్ అనదగ్గ మూవీకి తన మిగతా చిత్రాలతో పోలిస్తే అంత పెద్ద విజయం దక్కలేదు. అందుకు బాక్సాఫీస్ పరిస్థితులు కూడా కారణమే. అదే టైంలో రిలీజైన విజయ్ అనువాద చిత్రం ‘లియో’కు విపరీతమైన హైప్ రావడం బాలయ్య చిత్రంపై ప్రభావం చూపించింది. ఇది పూర్తి స్థాయి మాస్ మూవీ కాకపోవడంతో ఆ వర్గం ప్రేక్షకులు కూడా అనుకున్నంతగా ఆదరించలేదు.

కానీ తర్వాత అందరూ మరిచిపోయిన సినిమాకు ఇప్పుడు సోషల్ మీడియాలో మామూలు ఎలివేషన్లు పడట్లేదు. ‘భగవంత్ కేసరి’ ఆధారంగా తెరకెక్కిన తమిళ చిత్రం ‘జననాయకుడు’ నిన్ననే రిలీజైంది. ఈ సినిమా చూసిన వాళ్లందరూ బాలయ్య సినిమాను కొనియాడుతున్నారు. దాన్నో గొప్ప సినిమాగా అభివర్ణిస్తున్నారు. L

‘భగవంత్ కేసరి’ని చెడగొట్టారంటూ ‘జననాయకుడు’ మీద విరుచుకుపడుతున్నారు. ఆ సినిమాతో పోల్చి చూస్తే అందరికీ బాలయ్య సినిమా గొప్పదనం అర్థమవుతోంది. ఒరిజినల్లోనే సీన్లను పెద్ద ఎత్తున సోషల్ మీడియాలో పోస్ట్ చేస్తున్నారు.

వాటిలో బాలయ్య పెర్ఫామెన్స్ చూసినా.. డైలాగులు గమనించినా.. సన్నివేశాల్లోని ఇంటెన్సిటీ చూసినా.. విజయ్ సినిమా తేలిపోతోంది. మంచి కథను అవసరం లేని మార్పులు చేర్పులతో చెడగొట్టారని.. అసలు పెర్ఫామెన్స్‌లో బాలయ్య ముందు విజయ్ ఏమాత్రం నిలవలేకపోయారని విమర్శలు గుప్పిస్తున్నారు.

‘జననాయకుడు’ రిలీజైన దగ్గర్నుంచి ‘భగవంత్ కేసరి’ పెద్ద ఎత్తున ట్రెండ్ అవుతూ.. అనూహ్యంగా కల్ట్ స్టేటస్ తెచ్చుకుంటుండడం విశేషం. అప్పుడు విజయ్ సినిమా వల్లే దెబ్బ తిన్న ‘భగవంత్ కేసరి’ ఇప్పుడు విజయ్ మూవీ వల్లే మంచి పేరు సంపాదిస్తుండడం ఇందులో కొసమెరుపు.