సలార్ ఇవ్వనిది లెనిన్ అందించింది

రిలీజైన రోజు నుంచి వీకెండ్ దాకా చెడుగుడు ఆడేసిన లెనిన్ ఎట్టకేలకు అఖిల్ కెరీర్ లో ఒక హిట్టుని చేర్చేసింది. గతంలో మోస్ట్ ఎలిజిబుల్ బ్యాచిలర్ ఓ మోస్తరుగా పర్వాలేదనిపించుకున్నా ఓవరాల్ గా దాన్ని సక్సెస్ క్యాటగిరిలో వేసేందుకు అభిమానులే అంతగా ఇష్టపడరు. అందుకే అయ్యగారు ఎప్పుడు నెంబర్ వన్ అవుతారని వాళ్ళ ఎదురు చూపులు కొనసాగాయి. ఎవరో సీనియర్ దర్శకుడు కాకుండా ఒక్క సినిమా అనుభవమున్న మురళికిషోర్ దాన్ని చేసి చూపించారు.

ప్రధానంగా లెనిన్ లో హీరో తర్వాత ఎక్కువగా హైలైట్ అయ్యింది, నిడివి దక్కించుకుంది విలన్ పాత్ర. వసంత్ పేరుతో సినిమా మొదలైన అరగంట తర్వాత వచ్చి క్లైమాక్స్ దాకా దాదాపు తన ఉనికిని ప్రతి ఫ్రేమ్ లో చాటుకునేలా చేసిన అతని పేరు ప్రమోద్ పంజు. సలార్ లో పృథ్విరాజ్ సుకుమారన్ పక్కన ఉంటూ ప్రభాస్ ని ఆపమని చెప్పే బాచిరాజ మన్నార్ ఇతనే. ఆపమని చెప్పన్నా అంటూ ఒకే డైలాగుతో బాగానే గుర్తుండిపోయాడు. కాకపోతే పెద్ద స్పేస్ దక్కలేదు.

ఏదైతే సలార్ లో పూర్తిగా దక్కలేదో అది లెనిన్ ఇచ్చేసింది. ప్రమోద్ పంజు కన్నడ నటుడు. టీవీ సీరియల్ నటుడిగా ప్రస్థానం మొదలుపెట్టి 2015 గీతా బ్యాంగిల్ స్టోర్ తో ఎంట్రీ ఇచ్చాడు. ఈ పదకొండు సంవత్సరాల కాలంలో చేసినవి చాలా తక్కువ సినిమాలు. మొత్తం పది కూడా లేవు. 2021 రత్నన్ ప్రపంచలో కర్ణాటక స్టేట్ అవార్డు దక్కించుకున్నాడు. అయినా కూడా కథల ఎంపికలో చాలా జాగ్రత్తగా ఉండే ప్రమోద్ పంజు ఎట్టకేలకు లెనిన్ రూపంలో బ్రేక్ అందుకున్నాడు.

ప్రస్తుతం తను హల్కా డాన్, ఇంగ్లీష్ మాంజా అనే రెండు కన్నడ సినిమాల్లో నటిస్తున్నాడు. లెనిన్ తర్వాత తెలుగు నుంచి బాగానే ఆఫర్లు వస్తున్నాయట. మన దగ్గర విలన్ల కొరత గత కొన్నేళ్లుగా చాలా ఉంది. దాన్ని తీర్చేలా ప్రమోద్ కనక ఎక్కువ చిత్రాలు టాలీవుడ్ లో చేస్తే మంచి భవిష్యత్తు ఉంటుంది. కాకపోతే కేవలం విలన్ గానే నటిస్తాడా లేక సపోర్టింగ్ రోల్స్ కూడా చేస్తాడా అనేది వేచి చూడాలి. అన్నట్టు ప్రమోద్ లెనిన్ ప్రమోషన్లలో ఎక్కువ హైలైట్ కాలేదెందుకో.