కాంతార మళ్లీ వస్తుంది… కానీ

దక్షిణాది సినీ చరిత్రలోనే అతి పెద్ద సంచలనాల్లో ‘కాంతార’ ఒకటి. కేవలం రూ.15 కోట్ల బడ్జెట్లో ప్రాంతీయ భాషా చిత్రంగా తెరకెక్కిన ఈ కన్నడ మూవీ.. పాన్ ఇండియా స్థాయిలో ఎంత పెద్ద విజయం సాధించిందో తెలిసిందే. మొదట కన్నడలో అద్భుత స్పందన రావడంతో ఆ తర్వాత ఈ చిత్రాన్ని తెలుగు, హిందీ, తమిళ భాషల్లో అనువదించి లేటుగా రిలీజ్ చేస్తే ప్రతి చోటా భారీ వసూళ్లు రాబట్టి ఫుల్ రన్లో రూ.400 కోట్ల మార్కును అందుకుంది.

హీరో కమ్ డైరెక్టర్ రిషబ్ శెట్టి.. ఈ చిత్రానికి సీక్వెల్ చేయగా అది ఇంకా పెద్ద బ్లాక్ బస్టర్ అయి 900 కోట్ల వసూళ్లు సాధించింది. ఐతే ‘కాంతార: చాప్టర్-1’ పేరుతో వచ్చిన ఈ చిత్రానికి ఇంకో సీక్వెల్ ఉంటుందనే అభిమానులు ఆశతో ఉన్నారు. కానీ రిషబ్ వేరే ప్రాజెక్టుల్లో బిజీ అయిపోవడం, మరోవైపు నిర్మాణ సంస్థ హోంబలే ఫిలిమ్స్‌తో రిషబ్‌కు ఏవో అభిప్రాయ భేదాలు రావడంతో ఈ చిత్రం ఉంటుందో లేదో అన్న సందేహాలు కలిగాయి.

కానీ రిషబ్ తన పుట్టిన రోజు సందర్భంగా ‘కాంతార: చాప్టర్-2’ గురించి అప్‌డేట్ ఇచ్చాడు. కాంతార ప్రపంచం కచ్చితంగా కొనసాగుతుందని అతను చెప్పాడు. తాను దర్శకత్వం చేయకుండా ఖాళీగా కూర్చోలేనని అతను స్పష్టం చేశాడు. తన రైటింగ్ టీంతో సంప్రదింపులు జరుగుతున్నాయని.. కాంతార నెక్స్ట్ సీక్వెల్‌కు కథ రెడీ అవుతుందని.. భవిష్యత్తులో కచ్చితంగా ఆ సినిమా ఉంటుందని అతను తేల్చాడు.

ఐతే హోంబలే ఫిలిమ్స్ సంస్థలోనే ఈ సినిమా ఉంటుందా అన్నది మాత్రం డౌటే. ఎందుకంటే గత పుట్టిన రోజుకు రిషబ్‌కు సోషల్ మీడియాలో మాంచి ఎలివేషన్ ఇచ్చిన ఈ సంస్థ.. ఈ సారి బర్త్ డేకి కనీసం విష్ చేయలేదు.

కొన్ని నెలల ముందు హోంబలే ఫిలిమ్స్ సోషల్ మీడియా అకౌంట్లను రిషబ్ అన్ ఫాలో చేయడంతో ఆ సంస్థ అధినేతలతో రిషబ్‌కు సంబంధాలు దెబ్బ తిన్నట్లుగా అనుమానాలు వ్యక్తయ్యాయి. తాజా పరిణామాలు చూస్తుంటే ఆ సందేహాలు నిజమే అనిపిస్తోంది. ఐతే భారీతనానికి మారుపేరైన హోంబలే ‘కాంతార’కు దూరం కావడం నిరాశ కలిగించే విషయమే అయినా.. ఈ క్రేజీ సీక్వెల్ కోసం వందల కోట్లు పెట్టడానికి వేరే నిర్మాణ సంస్థలు ఎగబడతాయనడంలో :సందేహం లేదు. రిషబే స్వయంగా ఈ చిత్రాన్ని నిర్మించినా ఆశ్చర్యం లేదు.