ఇళయరాజా ఇకపై ఊరికే ఉంటారా

కోలీవుడ్ లోనే కాదు మన టాలీవుడ్ మ్యూజిక్ లవర్స్ లోనూ ఢిల్లీ కోర్టు ఉత్తర్వులు హాట్ టాపిక్ గా మారాయి. ఇళయరాజా కంపోజ్ చేసిన 134 సినిమాల పాటల ఆడియో హక్కులు వాటిని కొన్న సరేగామా సంస్థకే చెందుతాయని, అంతకు ముందు వాటిని చేయించుకుని మీకు పారితోషికం ఇచ్చిన నిర్మాతకు ఉంటాయి తప్ప మీకు కాదని ఢిల్లీ హైకోర్టు ఇచ్చిన ఉత్తర్వులు తీవ్ర చర్చకు దారి తీస్తున్నాయి. దీంతో వివాదంలో పడ్డ ఈ 134 సినిమాల సాంగ్స్ ఏ ప్లాట్ ఫార్మ్ పై ఉంచడానికి వీలు లేదు.

ఇప్పుడు అందరి మదిలో మెదులుతున్న ప్రశ్న ఒకటే. ఇకపై ఏదైనా సినిమాలో ఇళయరాజా పాటలు వాడుకుంటే ఆయన కేసు వేస్తారా లేదాని. ఇక్కడే అసలు ట్విస్ట్ ఉంది. న్యాయస్థానం అభ్యంతరం చెప్పింది కేవలం 134 సినిమాల గురించే. ఇంకో వెయ్యి దాకా ఆయన డిస్కోగ్రఫీలో ఉన్నాయి. సో వాటి మీద రైట్స్ అలాగే ఉంటాయి. ఒకవేళ ఎవరైనా దర్శకులు సారెగామా సొంతం చేసుకున్న సాంగ్స్ వాడుకోవాలంటే ఆ కంపెనీకి రాయల్టీ చెల్లింది హక్కులు పొందాలి.

కాపీ రైట్ చట్టం చాలా క్లిష్టంగా ఉంటుంది. దాన్ని సాంతం అవగాహన చేసుకుంటే తప్ప ఇలాంటి విషయాల్లో పోరాడలేం. ఇళయరాజా ఎందుకింత పట్టుదలతో ఉన్నారంటే కారణం పాటలను తమ ఆస్తిగా భావించే సంగీత దర్శకులకు న్యాయం జరగాలని. ఇందులో ఆయన చేసిన మంచి కూడా ఉంది. ఇలాంటి కాంట్రావర్సిల వల్ల పాత చిత్రాల ప్రొడ్యూసర్లు బాగా లాభ పడుతున్నారు. మ్యూజిక్ సంస్థలు ఒక్కో పాట మీద లక్షల రూపాయల ఆదాయాన్ని పొందుతున్నాయి.

ఇళయరాజా దీని మీద మళ్ళీ అప్పీల్ చేస్తారో లేదో చూడాలి. దక్షిణాది పరిశ్రమలో తిరుగు లేని ముద్ర వేసిన ఈ లెజెండరీ మ్యూజిక్ డైరెక్టర్ ఇప్పటికీ ఉత్సాహంగా సినిమాలకు పని చేస్తున్నారు. దేశ విదేశాల్లో లైవ్ కన్సర్ట్స్ ఇస్తూనే ఉన్నారు. తెలుగులో చేయడం తగ్గించారు కానీ తమిళంలో ఇప్పటికీ న్యూ జనరేషన్ దర్శకులు ఆయనతో సంగీతం చేయించుకోవడానికి ఉత్సాహం చూపిస్తున్నారు. ఇదంతా సద్దుమణిగే వరకు ఆ 134 సినిమాల హక్కులు ఇళయరాజాకు లేనట్టే.