బుచ్చిబాబు రెహమాన్ మళ్ళీ పేల్చేశారు

టాలీవుడ్ స్టార్ హీరోలందరిలోనూ ఒక ఎనర్జీ ఉంటుంది. దాన్ని సరిగ్గా వాడుకోవడం తెలిసిన దర్శకులే అద్భుతాలు చేస్తారు. సుకుమార్ చూపించబట్టే అల్లు అర్జున్ ఇవాళ జాతీయ స్థాయిలో పుష్ప ద్వారా ప్యాన్ ఇండియా మార్కెట్ సంపాదించుకున్నాడు. రాజమౌళి విజన్ లేకపోయి ఉంటే ప్రభాస్ స్టార్ డం ఇప్పుడు మరోలా ఉండేదేమో. ఇప్పుడీ ప్రస్తావనకు కారణం పెద్ది. ఇప్పటిదాకా వచ్చిన రెండు పాటలు చికిరి చికిరి, రైరైరారై విడుదలైన కొన్ని గంటల్లోనే ఛార్ట్ బస్టర్స్ అయిపోయాయి.

సోషల్ మీడియాని ట్వీట్లు రీల్స్ తో నింపేశాయి. ఇంత యునానిమస్ గా ఈ మధ్యలో ఫుల్ పాజిటివ్ బజ్ తెచ్చుకున్న ఆల్బమ్ పెద్ది అనడంలో అతిశయోక్తి లేదు. రామ్ చరణ్ డాన్స్ వల్లే ఇవి హైలైట్ అయ్యాయని ఫ్యాన్స్ అనొచ్చు. అది నిజం. కానీ క్రెడిట్ బుచ్చిబాబు, రెహ్మాన్ కు ఇవ్వాలి. ఎందుకంటే ఇదే చరణ్ ని గేమ్ ఛేంజర్ లో శంకర్ వృథా చేసుకున్నారు. రా మచ్చా సాంగ్ కొరియోగ్రఫీ, బీచ్ రోడ్డులో చేయించిన డాన్స్ బిట్ ఎంత బ్యాడ్ అవుట్ ఫుట్ గా నిలిచాయో తెలిసిందే.

ఆచార్యలో చరణ్ ఉన్నది అరగంటే అయినా తన గ్రేస్ ని వాడుకోవడంలో కొరటాల శివ కూడా ఫెయిలయ్యారు. ఆర్ఆర్ఆర్ రాజమౌళి సినిమా కాబట్టి దాన్ని ప్రత్యేకంగా ప్రస్తావించనవసరం లేదు. కానీ బుచ్చిబాబు ఏకంగా స్టేడియం బయటికి సిక్సర్ కొట్టేశారు. రెహమాన్ కంపోజింగ్, బుచ్చి పిక్చరైజేషన్, జానీ మాస్టర్ నృత్య రీతులు వెరసి అభిమానులతో రిపీట్ మోడ్ లో వ్యూస్ తెస్తున్నాయి. టీజర్, చికిరి చికిరి, రైరైరారై వరసగా మూడు కంటెంట్లు బ్లాక్ బస్టర్ అయ్యాయి.

ఇప్పటికే సరిపడా ఉన్న బజ్ ని ఇవి మరింత పెంచుతున్నాయి. ఇంకా ట్రైలర్ రావాలి. మరో రెండు సాంగ్స్ బ్యాలన్స్ ఉన్నాయి. శివరాజ్ కుమార్, జగపతి బాబు తదితరుల పాత్ర పరిచయాలు వీడియో రూపంలో జరగలేదు. ఇవన్నీ వచ్చేస్తే అంచనాలు ఏ స్థాయికి వెళ్ళిపోతాయో వేరే చెప్పనక్కర్లేదు. ముఖ్యంగా జాన్వీ కపూర్ కాంబినేషన్ లో రామ్ చరణ్ ఎలాంటి రొమాంటిక్ సాంగ్ చేసి ఉంటాడోననే ఆసక్తి మూవీ లవర్స్ లో విపరీతంగా ఉంది. ఏదైతేనేం రెహమాన్, బుచ్చిబాబు కలిసి పెద్ది రూపంలో మరో డైనమెట్ అయితే పేల్చేశారు. ఫ్యాన్స్ కోరుకునేది ఇదే.