తమన్ నోరు జారి సరిచేసుకున్నా…

ఈ రోజుల్లో స్టేజ్ మీద కొంచెం మాట అటు ఇటు అయితే ఎంత పెద్ద వివాదాలు చెల‌రేగుతున్నాయో తెలిసిందే. సీనియ‌ర్ న‌టుడు శివాజీ రెండు నెల‌ల ముందు ఇలా నోరు జారి తీవ్ర విమ‌ర్శ‌లు ఎదుర్కొన్నాడు. చాలా రోజుల పాటు ఆ వివాదం న‌డిచింది.

మాట‌ల ఫ్లోలో ఏదో అనేసి.. ఆ త‌ర్వాత నాలుక క‌రుచుకోవ‌డం, సారీ చెప్ప‌డం, త‌మ‌ మాట‌ల్ని వ‌క్రీక‌రించార‌ని పేర్కొన‌డం, త‌మ‌ ఉద్దేశం వేర‌ని మాట మార్చ‌డం.. ఇలా చాలా జ‌రుగుతుంటాయి. సంగీత ద‌ర్శ‌కుడు త‌మ‌న్ బ్యాండ్ మేళం అనే చిన్న సినిమా ఈవెంట్లో ఒక మాట పొర‌పాటుగా మాట్లాడి.. వెంట‌నే స‌ర్దుకున్నాడు. ఇదేదో వివాదం అవుతుంద‌ని త‌క్ష‌ణం గ్ర‌హించి క‌వ‌ర్ చేసే ప్ర‌య‌త్నం చేశాడు.

కోర్టు సినిమాలో ముఖ్య పాత్ర‌లు పోషించిన టీనేజీ ఆర్టిస్టులు రోష‌న్, శ్రీదేవి.. బ్యాండ్ మేళంలో లీడ్ రోల్స్ చేసిన సంగ‌తి తెలిసిందే. కోర్టు సినిమా త‌ర‌హాలోనే ఈ మూవీలోనూ ఆన్ స్క్రీన్, ఆఫ్ స్క్రీన్ వీరి మ‌ధ్య మంచి కెమిస్ట్రీ పండిన సంకేతాలు క‌నిపిస్తున్నాయి.

బ్యాండ్ మేళం టీజ‌ర్ లాంచ్ ఈవెంట్‌కు అతిథిగా హాజ‌రైన త‌మ‌న్ ఇదే విష‌యం గురించి మాట్లాడుతూ.. మీ ఇద్ద‌రి మ‌ధ్య కెమిస్ట్రీ ఫిజిక్స్‌గా మార‌కుండా చూసుకోండి అన‌డంతో అంద‌రూ ఆశ్చ‌ర్యానికి గుర‌య్యారు. రోష‌న్, శ్రీదేవి సైతం అంత మాట అనేశాడేంటి అన్న‌ట్లు ఆశ్చ‌ర్య‌పోతూ న‌వ్వుకున్నారు. ఆడిటోరియంలో కూడా కుర్రాళ్లు గ‌ట్టిగా అరిచారు.

ఐతే తాను నోరు జారాన‌ని వెంట‌నే అర్థం చేసుకున్న త‌మ‌న్… త‌న మాట‌ల‌ను క‌వ‌ర్ చేసే ప్ర‌య‌త్నం చేశాడు. త‌న ఉద్దేశం ఇద్ద‌రూ గొడ‌వ‌ప‌డ‌కుండా మంచిగా ఉండాల‌నే అని.. చాలా దూరం ప్ర‌యాణించాల్సిన వాళ్లు గొడ‌వ‌లు ప‌డ‌కూడ‌ద‌నే అని వ్యాఖ్యానించాడు.

అయినా కుర్రాళ్లు అరుస్తుంటే.. మీరు ఇంకోలా అనుకోకండి, నేను పెద్ద‌గా చ‌దువుకోలేదు. ఐదో క్లాస్ ఫెయిల‌య్యాను. నాకు జువాల‌జీ అదీ ఏమీ తెలియ‌దు అంటూ త‌మ‌న్ కూల్ చేసే ప్ర‌య‌త్నం చేశాడు. అయినప్పటికీ అంత పెద్ద మ్యూజిక్ డైరెక్టర్ అటువంటి మాట మాట్లాడకుండా ఉండవల్సిందని.. సోషల్ మీడియా యుగంలో డ్యామేజ్ చెయ్యడానికి ఆ ఒక్క మాట చాలని నెటిజన్లు కామెంట్లు చేస్తున్నారు.