దేవర 2 ఎప్పుడు రావొచ్చంటే

ఇవాళ దేవర విడుదలై ఏడాది గడిచిన సందర్భంగా ఆ బ్లాక్ బస్టర్ జ్ఞాపకాలను అభిమానులు సోషల్ మీడియాలో పంచుకుంటున్నారు. నిర్మాణ సంస్థ ఎన్టీఆర్ ఆర్ట్స్ ఒక పోస్టర్ తో పాటు దేవర 2 త్వరలోనే ప్రారంభమవుతుందనే రీతిలో మెసేజ్ పెట్టడంతో ఫ్యాన్స్ యాక్టివ్ అయిపోయారు. నిజానికి దేవర 2 ఉండదని, కొరటాల శివ వేరే ప్రాజెక్టుకు వెళ్ళిపోతున్నాడని, నాగచైతన్యతో చర్చలు జరిగాయని ఇలా రకరకాల లీకులు ప్రచారం జరిగాయి. కానీ దేవరని విపరీతంగా ఇష్టపడిన జూనియర్ ఎన్టీఆర్ ఎట్టి పరిస్థితుల్లో సీక్వెల్ ని పక్కనపెట్టే ఆలోచనలో లేడని గతంలోనే టాక్ వచ్చింది. ఇప్పుడది నిజమైపోయింది.

సరే వినడానికి బాగానే ఉంది కానీ ఇంతకీ దేవర 2 ఎప్పుడు స్టార్ట్ అవొచ్చు ఎప్పుడు రిలీజనే విశ్లేషణకు వద్దాం. ప్రస్తుతం ప్రశాంత్ నీల్ తో ప్యాన్ ఇండియా మూవీ చేస్తున్న తారక్ దీని తర్వాత త్రివిక్రమ్ శ్రీనివాస్, నెల్సన్ దిలీప్ కుమార్ కు కమిట్ మెంట్స్ ఇచ్చాడు. కొరటాల శివ దేవర 2 స్క్రిప్ట్ ని పూర్తి చేసి ప్రీ ప్రొడక్షన్ పనులను ఒక కొలిక్కి తెస్తున్నాడని ఆల్రెడీ టాక్ ఉంది. త్రివిక్రమ్ ముందు వెంకటేష్ సినిమా పూర్తి చేయాలి. ఇంకా సెట్స్ పైకే వెళ్ళలేదు. విఎఫెక్స్ డిమాండ్ చేసే సబ్జెక్టు కాదు కాబట్టి 2026 వేసవికల్లా పూర్తయిపోతుంది. ఆ తర్వాత తారక్ తో చేయబోయే ఫాంటసీ మూవీ రైటింగ్ మొదలుపెట్టాలి.

ఇక నెల్సన్ దిలీప్ కుమార్ విషయానికి వస్తే రజనీకాంత్ జైలర్ 2 వచ్చే సంవత్సరం జూన్ రిలీజ్ కు సిద్ధమవుతోంది. అప్పటిదాకా అతనూ ఫ్రీ కాడు అంటే వీళ్లిద్దరి కంటే ఎక్కువ ఛాన్స్, తగినంత సమయం ఉన్నది కొరటాల శివకే కాబట్టి దేవర 2ని వెంటనే మొదలుపెట్టొచ్చు. ఎలాగూ సెట్స్ సిద్ధంగా ఉన్నాయి, ఆర్టిస్టుల డేట్స్ ని తీసుకుంటే సరిపోతుంది. ముఖ్యంగా జాన్వీకపూర్, సైఫ్ అలీ ఖాన్ తో పాటు బాబీ డియోల్ కాల్ షీట్లు సమన్వయం చేసుకోవాలి. దేవర 2 మీద భారీ అంచనాలు నెలకొన్న నేపథ్యంలో కొరటాల శివ మొదటి భాగం మీద వచ్చిన కంప్లయింట్స్ రిపీట్ కాకుండా జాగ్రత్త పడుతున్నారట.