వెయ్యి రూపాయలైనా డోంట్ కేర్

ఇంకా ప్రభుత్వాల నుంచి జీవోలు రాలేదు. నిర్మాతలు ఎంతమేరకు పెంపు అడుగుతూ అప్లికేషన్లు పెట్టారో క్లారిటీ లేదు. అయినా సరే అప్పుడే డిస్ట్రిబ్యూషన్ వర్గాలు, అభిమానుల సంఘాల మధ్య దీని గురించి చర్చలు మొదలైపోయాయి. సెప్టెంబర్ 24 రాత్రి తొమ్మిది నుంచి పది గంటల మధ్య వేసే స్పెషల్ ప్రీమియర్లకు వెయ్యి రూపాయలను ఫ్లాట్ టికెట్ రేట్ గా పెట్టాలని చూస్తున్నట్టుగా వచ్చిన వార్త హాట్ టాపిక్ గా మారింది. దాని తర్వాత అర్ధరాత్రి ఒంటి గంట వేసే షోకు అయిదు వందలు, ఆపై రెగ్యులర్ ఆటలకు కనీసం వంద నుంచి నూటా యాభై దాకా పెంపుతో కనీసం పది రోజులైనా పర్మిషన్లు తీసుకుంటారని ట్రేడ్ టాక్.

బయట ఓజి మేనియా చూస్తుంటే అభిమానులు వెయ్యి అంటే డోంట్ కేర్ అనేలా ఉన్నారు. ఎందుకంటే ట్విట్టర్ స్పేస్ లో ఫస్ట్ టికెట్ సేల్ పెడితే ఒక ఫ్యాన్ లక్ష రూపాయలకు పాడుకోవడం దీనికున్న క్రేజ్ కున్న నిదర్శనం. ఓవర్సీస్ లో అయిదు లక్షలు ఇచ్చేందుకు ఒక ఎన్ఆర్ఐ రెడీ అయ్యాడు. ఈ డబ్బులు వెళ్ళేది జనసేన నిధికే అయినా వాళ్ళు ఓజినే దానికి ఎంచుకోవడం హైప్ ఏ స్థాయిలో ఉందో తేటతెల్లం చేస్తోంది. ఆఫ్ ది రికార్డు పంపిణీదారులు చెబుతున్న మాట ఒకటే. ముందు రోజు రాత్రి షో వెయ్యి పెట్టినా సరే హౌస్ ఫుల్స్ పడటం ఖాయమని అంటున్నారు. చాలా ధీమా వ్యక్తం చేస్తున్నారు.

వీటికి సంబంధించిన పూర్తి క్లారిటీ ఇంకో నాలుగైదు రోజుల్లో రావొచ్చు. విడుదలకు కేవలం తొమ్మిది రోజులు మాత్రమే ఉంది. ట్రైలర్ లాంచ్, ప్రీ రిలీజ్ ఈవెంట్ కు ప్లానింగ్ జరుగుతోంది. ఇవి కాకుండా పవన్ కళ్యాణ్ అదే పనిగా బయటికి వచ్చి చేసే ప్రమోషన్లు ఉండకపోవచ్చు. కొన్ని ప్రత్యేక ప్రోమోలను టీమ్ ఆల్రెడీ షూట్ చేసి పెట్టుకుంది. ప్రస్తుతానికి టీమ్ సైలెంట్ గా ఉన్నట్టు కనిపిస్తున్నా అండర్ కరెంట్ లా ఓజి మేనియా జనాల్లో మాములుగా లేదు. అయినా హరిహర వీరమల్లుకే రేట్లు లెక్క చేయని అభిమానులు ఇప్పుడు ఓజికి మాత్రం క్యాలికులేటెడ్ గా ఉంటారా. ఏమో చూడాలి మరి.