సూరికి టైమ్ ఇచ్చిన పవన్ కళ్యాణ్ ?

ఏపీ డిప్యూటీ సిఎం పవన్ కళ్యాణ్ సినిమాల్లో రావాల్సినవి రెండే ఉన్నాయి. ఓజి షూటింగ్ పూర్తి చేసుకుని సెప్టెంబర్ 25 రిలీజ్ కు రెడీ అవుతోంది. ఉస్తాద్ భగత్ సింగ్ చివరి దశలో ఉంది. వారం లోపే గుమ్మడికాయ కొట్టేలా ఉన్నారు. హరిహర వీరమల్లు పార్ట్ 1 ఫలితం చూశాక రెండో భాగం మీద ఆశలు సన్నగిల్లాయి. ఒకవేళ నిర్మాత ఏఎం రత్నం, దర్శకుడు జ్యోతికృష్ణలు పూనుకున్నా ఫ్యాన్సే వద్దనేలా ఉన్నారు. వీటి సంగతి పక్కనపెడితే పవన్ ఎప్పుడో కమిట్ మెంట్ ఇచ్చిన మూవీ మరొకటి ఉంది. నిర్మాత రామ్ తాళ్ళూరితో సురేందర్ రెడ్డి దర్శకత్వంలో అఫీషియల్ ప్రకటన వచ్చి ఏళ్ళు గడిచిపోయాయి. తర్వాత అప్డేట్ లేదు.

తాజా సమాచారం మేరకు ఇది కూడా లైన్ లోకి వస్తోందట. అయితే సురేందర్ రెడ్డి ముందు చెప్పిన కథకు ఎక్కువ డేట్స్, భారీ బడ్జెట్ అవసరం ఉండటంతో దాన్ని పక్కనపెట్టేసి ఒక తమిళ రీమేక్ ని పవన్ సూచించినట్టు ఒక గాసిప్ ఇండస్ట్రీ వర్గాల్లో తిరుగుతోంది. రాజకీయంగా తానున్న బిజీలో ఎక్కువ స్ట్రెయిట్ ఫిలింస్ చేయలేనని, వేగంగా పూర్తయ్యే ఛాన్స్ ఉన్న రీమేకుల మీద దృష్టి పెట్టడం తప్ప వేరే ఆప్షన్ లేదని సూరికి చెప్పినట్టుగా వినికిడి. ఏజెంట్ తో దారుణమైన డిజాస్టర్ మూటగట్టుకున్న సురేందర్ రెడ్డికి ఎస్ అనడం మినహా మరో మార్గం ఉండదు. ఎందుకంటే పవన్ తో చేయడానికి వచ్చిన లైఫ్ టైం ఆపర్చునిటి ఇది.

ప్రస్తుతానికి ఇదంతా గాసిప్ స్టేజిలోనే ఉంది. ఇంకా నిర్ధారణగా తెలియలేదు. రామ్ తాళ్ళూరికి సినిమా అయిదారేళ్లుగా పవన్ కళ్యాణ్ పెండింగ్ లో పెడుతూ వచ్చారు. కథ దర్శకుడి కాంబో కుదరక ఇలా లేట్ అవుతూ వచ్చింది. ఇంకా ఎన్నికలకు నాలుగు సంవత్సరాల టైం ఉంది కాబట్టి ఈ లోగా మరో ఒకటి రెండు సినిమాలు చేసే ఆలోచనలో పవన్ కళ్యాణ్ ఉన్న మాట వాస్తవం. అది కూడా ఎవరైతే శరవేగంగా తీస్తారో వాళ్ళతో మాత్రమే అనే కండీషన్ మీద. మరి నెమ్మదిగా ఉండే సురేందర్ రెడ్డి పవన్ కోసం తన శైలిని మార్చుకోక తప్పదు. చూడాలి ఇంకెలాంటి అనూహ్య పరిణామాలు చోటు చేసుకుంటాయో.