సుహాస్ స్టామినాకిది అగ్ని పరీక్ష

చిన్న హీరోలు వేగంగా ఎక్కువ సినిమాలు చేయడం రెమ్యునరేషన్ పరంగా సంతృప్తినిస్తుందేమో కానీ కెరీర్ పరంగా ఒక్కోసారి ఇదే పెద్ద ప్రమాదంగా మారుతుంది. సుహాస్ కిది అనుభవమయ్యింది. ఒకటి హిట్టు కొట్టిందని ఆనందపడేలోగా వరసగా ఓ మూడు ఫ్లాపులు వచ్చేసి తన మార్కెట్ ని బాగా డ్యామేజ్ చేశాయి.

ఈ మధ్య ఓపెనింగ్స్ తేవడం మరీ కష్టమైపోయింది. ఓ భామ అయ్యో రామాకు ఈ పరిస్థితి తలెత్తింది. తమిళంలో మందాడితో విలన్ గా ఎంట్రీ ఇస్తున్న సుహాస్ కొత్త మూవీ హే బలవంత్ రేపు థియేటర్లలో అడుగు పెట్టనుంది. కంటెంట్ మీద నమ్మకంతో ఇవాళ రాత్రే మెయిన్ సెంటర్స్ లో ప్రీమియర్లు వేస్తున్నారు.

రేపు పోటీ కూడా చెప్పుకోదగ్గ స్థాయిలో ఉంది కానీ ప్రమోషన్ల వల్ల కాస్త ఎక్కువ దృష్టి హే బలవంత్ మీద ఉందన్నది వాస్తవం. కాకపోతే బంగారం లాంటి ఈ ఛాన్స్ ని ఎలా వాడుకుంటాడో చూడాలి. అసలే ఫ్యామిలీ బిజినెస్ అంటూ సస్పెన్స్ క్రియేట్ చేసి పబ్లిసిటీలో తెగ ఊదరగొట్టారు.

టాక్ లో ఇదే కీలకం కానుంది. కుటుంబ ప్రేక్షకులకు కనెక్ట్ అయ్యేలా ఆ పాయింట్ ఉందా ఓకే. లేదంటే రిస్క్ అవుతుంది. పైగా తండ్రి కొడుకుల ఎమోషన్ బలంగా ఉందంటూ, నరేష్ పాత్ర ద్వారా మహేష్ బాబు అభిమానులు ఊగిపోయే ఎపిసోడ్స్ ఉన్నాయంటూ రకరకాల ఊరింపులు చేశారు. ఇవన్నీ తెరమీద వర్కౌట్ కావాలి.

గత వారం వచ్చిన ఫంకీ మూడు రోజులకే చేతులు ఎత్తేయగా మంచి టాక్ వచ్చినప్పటికీ కపుల్ ఫ్రెండ్లీ కొంచెం ఎదురీదుతోంది. సో హే భగవాన్ కనక ఈ గ్యాప్ ని సరిగ్గా వాడుకుంటే థియేటర్ బ్రేక్ ఈవెన్ ఈజీగా అందుకోవచ్చు. రెండు వారాలకు పైగా థియేటర్లు జనాలు లేక ఘొల్లుమంటున్నాయి.

సరైన ఫీడింగ్ లేక చాలా చోట్ల సెకండ్ షోలు వేయడమే మానేశారు. సంక్రాంతి హడావిడి అయిపోయిన తర్వాత ఒక్కసారిగా పరిస్థితి డల్లుగా మారిపోయింది. ఇప్పుడు జోష్ రావాలంటే హే బలవంత్ లాంటివి ఆడాలి. ఎలాగూ నెక్స్ట్ వీక్ శ్రీవిష్ణు తన విష్ణు విన్యాసంతో వస్తున్నాడు. అప్పటిదాకా ఎవరు నెట్టుకొస్తారో రేపీపాటికి తేలిపోతుంది.