Gulte Telugu Telugu Political and Movie News Updates
హైదరాబాద్ లో పబ్లిక్ స్టేజి మీద వేలాది అభిమానులను ఉద్దేశించి అనిరుద్ రవిచందర్ లైవ్ పెర్ఫార్మన్స్ ఇవ్వడం ఇవాళ కింగ్డమ్ ఈవెంట్ మీద ప్రత్యేక ఆసక్తి కలిగేలా చేసింది. యూసఫ్ గూడ పోలీస్ గ్రౌండ్స్ లో జరిగిన ఈ వేడుకలో అందరి దృష్టి ఇతని మీదే ఉంది. సినిమాలో చార్ట్ బస్టర్ అయిన కదిలే కదిలే సాంగ్ ప్రత్యక్షంగా పాడటమే కాకుండా దేవరలో దూకే ధైర్యమ జాగ్రత్త, చుట్టమల్లే ఓ రెండు లైన్లు పాడి మమ అనిపించాడు. కింగ్డమ్ సాంగ్ మాత్రమే రెండున్నర నిముషాలు పెర్ఫార్మ్ చేయడం హైలైటయ్యింది. అయితే నిజానికి ఫ్యాన్స్ ఆశించింది చాలా ఎక్కువ. అంత మోతాదు అనిరుద్ ఇవ్వలేదు.
దానికి కారణాలు లేకపోలేదు. అనిరుద్ స్టేజి మీద లైవ్ ఆర్కెస్ట్రా సెట్ చేసుకోలేదు. మాములుగా ఇలాంటి ఈవెంట్స్ చేసినప్పుడు మ్యూజిక్ డైరెక్టర్ బృందం మొత్తం హాజరవ్వాలి. గ్రూప్ డాన్సర్స్ ఉన్నారు కానీ తన పర్సనల్ టీమ్ ఎక్కువగా కనిపించలేదు. కరోకే పద్దతిలో బీజీఎమ్ ప్లే చేస్తూ అనిరుద్ లైవ్ లో పాడటం ద్వారా మంచి ఫీలింగ్ అయితే ఇచ్చాడు కానీ అభిమానుల కోణంలో చూసుకుంటే డోస్ సరిపోలేదు. మరొక ముఖ్యమైన విషయం ఏంటంటే ఇది కింగ్డమ్ ప్రీ రిలీజ్ ఈవెంట్, ఆడియో లాంచ్ కాదు. అందుకే అనిరుద్ ని ఎక్కువ హైలైట్ చేయడం సాధ్యపడలేదు. మరో సంగతి ఇక్కడ చెప్పుకోవాలి.
అనిరుధ్ హుకుం పేరుతో లైవ్ టూర్స్ చేస్తున్నాడు. వచ్చే నెల మూడో వారంలో చెన్నై వేదికగా భారీ ఎత్తున కన్సర్ట్ జరగబోతోంది. టికెట్ రేట్లు భారీగా ఉన్నా హాట్ కేకుల్లా అమ్ముడుపోతున్నాయి. అలాంటి చోట ప్రత్యేకంగా పెర్ఫార్మ్ చేయడానికి అనిరుద్ చేసుకునే ఏర్పాట్లు వేరే ఉంటాయి. ఇలా కింగ్డమ్ లాంటి సినిమా వేడుకల్లో వాటిని పెట్టలేడు. సో ఈ కోణంలో చూసుకుంటే అనిరుద్ చేసింది రైటే. ఈ మాత్రం భాగ్యానికి కూడా గతంలో తను కంపోజ్ చేసిన తెలుగు సినిమాలు నోచుకోలేదు. ఇప్పుడు విజయ్ దేవరకొండ మూవీ శ్రీకారం చుట్టింది కాబట్టి ఇకపై టాలీవుడ్ స్ట్రెయిట్ ఈవెంట్స్ లో అతన్ని తరచుగా కలుసుకోవచ్చు.
