తారక్ వల్ల కాలేదు.. చరణ్ వల్ల అవుతుందా?

ఒక భారీ పాన్ ఇండియా హిట్ కొట్టాక.. ఆ హీరో నటించే సినిమా జాతీయ స్థాయిలో ఎలా ఆడుతుందనే ఆసక్తి అందరిలోనూ ఉంటుంది. ఐతే ‘బాహుబలి’ తర్వాత ప్రభాస్ మార్కెట్ పెరిగినట్లుగా మిగతా హీరోల మార్కెట్ అయితే పెరుగుతుందా అన్నది సందేహంగానే ఉంది. ‘ఆర్ఆర్ఆర్’ తర్వాత జూనియర్ ఎన్టీఆర్ నుంచి వచ్చిన ‘దేవర’ సినిమా నార్త్ ఇండియాలో పెద్దగా ప్రభావం చూపలేకపోయింది.

మరి ‘ఆర్ఆర్ఆర్’లో మరో హీరో రామ్ చరణ్ నుంచి వస్తున్న ‘గేమ్ చేంజర్’ ఏమవుతుందన్నది ఆసక్తికరం. చరణ్ ఆల్రెడీ ‘ఆర్ఆర్ఆర్’ తర్వాత ‘ఆచార్య’ చేశాడు. కానీ అందులో లీడ్ రోల్ చిరుది. దాన్ని పాన్ ఇండియా సినిమాగా ఏ దశలోనూ ప్రొజెక్ట్ చేయలేదు. ఆ సినిమా కంప్లీట్ మిస్ ఫైర్ అయింది. దీంతో చరణ్ అభిమానుల ఆశలన్నీ ‘గేమ్ చేంజర్’ మీద నిలిచాయి. ఐతే ఈ సినిమా రిలీజ్ బాగా ఆలస్యం కావడం, మధ్యలో శంకర్ నుంచి వచ్చిన ‘ఇండియన్-2’ డిజాస్టర్ కావడం ప్రతికూలంగా మారింది.

ప్రస్తుతానికి పరిస్థితి చూస్తుంటే.. ‘గేమ్ చేంజర్’ పాన్ ఇండియా హిట్ కావడం అంత తేలిక కాదనే అనిపిస్తోంది. పాన్ ఇండియా స్థాయిలో సక్సెస్ కావాలంటే ప్రి రిలీజ్ బజ్ చాలా ముఖ్యం. కానీ ‘గేమ్ చేంజర్’కు అలాంటి బజ్ కనిపించడం లేదు. తెలుగు సినిమాలకు కన్నడలో ఎప్పుడూ మంచి హైపే ఉంటుంది. ఇక శంకర్ సినిమా కావడం వల్ల తమిళంలో ఈ చిత్రానికి కొంత బజ్ ఏర్పడింది. ఈ రాష్ట్రాలను మినహాయిస్తే ‘గేమ్ చేంజర్’ లో బజ్‌తోనే రిలీజవుతోంది.

ముఖ్యంగా పాన్ ఇండియా సక్సెస్‌కు కీలకమైన హిందీలో ‘గేమ్ చేంజర్’కు అనుకున్నంత హైప్ క్రియేట్ కాలేదు. అక్కడి ప్రేక్షకులు ఎక్కువగా ఎగ్జైట్ అవ్వాలంటే అది బాహుబలి తరహా ఈవెంట్ ఫిలిం అయ్యుండాలి. లేదంటే కేజీఎఫ్, పుష్ప తరహాలో కథాంశంలో డిఫరెంట్ వరల్డ్ ఉండి, రా అండ్ రస్టిక్ ఫీల్ కలగాలి. ఇవేవీ ‘గేమ్ చేంజర్’లో కనిపించడం లేదు. ట్రైలర్ చూస్తే మరీ సర్ప్రైజింగ్‌గా ఏమీ లేదు. ఈ నేపథ్యంలో టాక్ చాలా బాగుండి, పాన్ ఇండియా ప్రేక్షకులను ఆకర్షించే డిఫరెంట్ కంటెంట్ ఏదైనా ఉంటేనే ఈ చిత్రం జాతీయ స్థాయిలో సక్సెస్ అయ్యే స్కోప్ ఉంది. మరి అలాంటి మ్యాజిక్ ఏమైనా సినిమాలో శంకర్ క్రియేట్ చేశాడేమో చూడాలి.