పుష్పరాజ్ ఊపుని మల్లిగాడు కొనసాగించగలడా…

వెయ్యి కోట్ల గ్రాస్ తో టాలీవుడ్ జెండాని మరోసారి గర్వంగా పాతిన పుష్ప 2 ది రూల్ తర్వాత రెండు వారాల గ్యాప్ వస్తోంది. కొత్త సినిమాల కోసం మూవీ లవర్స్ ఎదురు చూస్తున్నారు. నితిన్ రాబిన్ హుడ్ తప్పుకోవడం దాదాపు ఖరారైపోవడంతో అల్లరి నరేష్ బచ్చల మల్లికి మంచి ఛాన్స్ దొరికింది. పోటీలో విడుదల పార్ట్ 2, యుఐ, మ్యాక్స్, ముఫాసా లాంటి డబ్బింగ్ సినిమాలున్నప్పటికీ తెలుగు నుంచి స్ట్రెయిట్ గా వస్తున్న వాటిలో బచ్చల మల్లికే ఎక్కువ ఎడ్జ్ ఉంటుంది. ఈ నేపథ్యంలో అందరి దృష్టి ట్రైలర్ మీదుంది. న్యాచురల్ స్టార్ నాని అతిథిగా ఇవాళ ట్రైలర్ లాంచ్ ఈవెంట్ చేశారు. కథను బాగానే రివీల్ చేశారు.

ఒళ్ళంతా పొగరు, నిర్లక్ష్యం ఉన్న మల్లిగాడి జీవితంలోకి ఓ అమ్మాయి వస్తుంది. చెడు అలవాట్లు ఉంటే మానుకోమని హితవు చెబుతుంది. సరేనంటాడు. ఇద్దరూ ప్రేమలో పడతారు. కానీ ఆ అమ్మడి వెనుక ఎంత బలమైన నేపథ్యం ఉందో మల్లి చూసుకోడు. తేడా వస్తే అవతలోడి తల పగలగొట్టేందుకు వెనుకాడని మల్లికి అనుకోని ప్రమాదాలు స్వాగతం చెబుతాయి. శత్రువులు కవ్విస్తారు. మరి దూసుకుపోయే మనస్తత్వాన్ని పక్కనపెట్టి ప్రియురాలిని ఎలా గెలుచుకున్నాడనేది అసలు స్టోరీ. మెయిన్ పాయింట్ మరీ కొత్తగా అనిపించకపోయినా మాస్ ట్రీట్ మెంట్ అంచనాలు, ఆసక్తి పెంచేలా ఉంది.

ముఖ్యంగా అల్లరి నరేష్ మేకోవర్ చూస్తుంటే తనలో ఇంత వయొలెంట్ యాంగిల్ ఉందా అని ఆశ్చర్యం కలగకమానదు. బచ్చల మల్లికి ఇది గొప్ప అవకాశం. పాజిటివ్ టాక్ తెచ్చుకుంటే జనవరి 10 గేమ్ ఛేంజర్ వచ్చేదాకా దాకా తిరుగుండదు. ఎలాగూ ఎలివేషన్లు, యాక్షన్ ఎపిసోడ్లు, అగ్రెసివ్ గా అనిపించే హీరోయిజం అన్ని పుష్కలంగా దట్టించారు కాబట్టి కంటెంట్ కనెక్ట్ అయితే హిట్టు కొట్టడం ఖాయం. కామెడీ జానర్ అంతగా వర్కౌట్ కాకపోవడంతో అల్లరోడు పూర్తిగా సీరియస్ జానర్ వైపు షిఫ్ట్ అయిపోయాడు. నాంది సక్సెసయ్యింది కానీ ఉగ్రం లాంటివి ఫలితం ఇవ్వలేదు. బచ్చల మల్లి సరికొత్త ఇమేజ్ ఇస్తుందనే నమ్మకంతో ఉన్నాడు.