Gulte Telugu Telugu Political and Movie News Updates
ఒక కథను రెండు భాగాలుగా తీస్తే.. ఫస్ట్ పార్ట్ రిలీజైన దగ్గర్నుంచి ప్రేక్షకులు గెస్సింగ్‌లో పడిపోతారు. తొలి భాగంలో అసంపూర్తిగా వదిలేసిన కథను ఎలా ముగిస్తారు.. పాత్రల పరంగా తలెత్తిన ప్రశ్నలకు ఎలాంటి సమాధానం ఇస్తారు అని ఎదురు చూస్తారు. ‘బాహుబలి: ది కంక్లూజన్’ రిలీజ్‌కు ముందు ‘కట్టప్ప బాహుబలిని ఎందుకు చంపాడు’ అనే ప్రశ్న జనాలను ఎంతగా ఉక్కిరిబిక్కిరి చేసిందో తెలిసిందే. సెకండ్ పార్ట్‌కు ఏ పబ్లిసిటీ లేకుండానే కావాల్సినంత హైప్ తెచ్చిపెట్టింది ఈ ప్రశ్న.
‘పుష్ప: ది రూల్’ విషయంలో ఇలాంటి పెద్ద ప్రశ్న ఏదీ లేదు కానీ.. ప్రేక్షకులు సమాధానం తెలుసుకోవాలని ఆశిస్తున్న ప్రశ్నలు చాలా ఉన్నాయి. ముఖ్యంగా పుష్ప, షెకావత్ మధ్య పోరు ఎలా ఉంటుందనే ఆసక్తి సర్వత్రా ఉంది. వీళ్లిద్దరి మధ్య ఎత్తులు పై ఎత్తులు ఎలా ఉంటాయన్నదే అత్యంత ఆసక్తి రేకెత్తించే అంశం. మాస్ ప్రేక్షకులు ప్రధానంగా ఎదురు చూస్తున్నది వీళ్లిద్దరి పోరు కోసమే. ఐతే మాస్ ఆడియన్స్ కోరుకునే అంశాలకు లోటు లేని ‘పుష్ప-2’లో ఎమోషనల్ బ్లాక్స్ కూడా గట్టిగానే పడ్డట్లు సమాచారం.
పుష్ప-శ్రీవల్లి మధ్య బలమైన ఎమోషన్ ఉంటుందని.. పుష్ప పాత్రను డ్రైవ్ చేసేది శ్రీవల్లి క్యారెక్టరే అని తెలుస్తోంది. ఇది కాక సినిమాలో ఒక పేలిపోయే ఎమోషనల్ బ్లాక్ ఉంటుందని.. అది ప్రేక్షకులను ఆశ్చర్యపరుస్తుందని సమాచారం. ‘పుష్ప’ కథలో అత్యంత కీలకమైన అంశం.. అతడికి ఇంటి పేరు లేకపోవడం. ఈ విషయంలో అవమానాలకు గురవడం వల్లే పుష్పలో కసి పెరిగి అంచెలంచెలుగా ఎదుగుతాడు. కానీ ఎంత ఎదిగినా అతడిని ఇంటి పేరు లేని బాధ వెంటాడుతూనే ఉంటుంది. ఈ నేపథ్యంలో పుష్ప-2లో అదిరిపోయే పేఆఫ్ సీన్ ఉంటుందట.
ప్రి క్లైమాక్స్‌లో వచ్చే ఆ ఎపిసోడ్ ప్రేక్షకులను ఎమోషనల్‌గా కదిలించేస్తుందని సమాచారం. పుష్పను మొదట్నుంచి అవమానిస్తూ వచ్చిన తన అన్నే అతడికి ఇంటిపేరును ఇచ్చే ఎపిసోడ్ ఇదని.. ఇందులో ఎమోషన్‌తో పాటు ఎలివేషన్ కూడా ఉంటుందని.. ఈ ఎపిసోడ్లో బన్నీ, అజయ్‌ల పెర్ఫామెన్స్ ఒక రేంజిలో ఉంటుందని సమాచారం. సినిమాకు హైలైట్‌గా నిలిచే ఈ ఎపిసోడ్ థియేటర్లలో ప్రేక్షకులకు మాంచి హై ఇస్తుందట.
