Gulte Telugu Telugu Political and Movie News Updates
కొన్ని సినిమాలు థియేటర్లలో పెద్దగా ఆడవు. కానీ ఓటీటీలో రిలీజయ్యాక ఇలాంటి సినిమా ఎందుకు ఫెయిలైందని డిజిటల్ ఆడియన్స్ ఆశ్చర్యపోతుంటారు. ఆ సినిమాలకు సోషల్ మీడియాలో ఒక రేంజిలో ఎలివేషన్లు వస్తుంటాయి. ఈ కోవలో ‘అంటే సుందరానికి..’ సహా చాలా చిత్రాలను చెప్పుకోవచ్చు. ఈ జాబితాలోకి చేరుకున్న కొత్త చిత్రం.. స్వాగ్.
శ్రీ విష్ణు హీరోగా ‘రాజ రాజ చోర’ దర్శకుడు హాసిత్ గోలి రూపొందించిన చిత్రమిది. పీపుల్స్ మీడియా సంస్థ దీన్ని నిర్మించింది. ఈ నెల 5న ‘స్వాగ్’ ప్రేక్షకుల ముందుకు వచ్చింది. కానీ ఈ చిత్రానికి రివ్యూలు చాలా వరకు నెగెటివ్‌గానే వచ్చాయి. ప్రేక్షకాదరణ కూడా అందుకు తగ్గట్లే వచ్చింది. సరైన వసూళ్లు లేక థియేటర్లలో ఈ సినిమా ఫ్లాప్‌గా మిగిలింది. ఐతే ఈ చిత్రాన్ని రిలీజైన మూడు వారాలకే ఓటీటీలోకి తెచ్చేశారు. అమేజాన్ ప్రైమ్ ద్వారా ఈ చిత్రం స్ట్రీమ్ అవుతోంది.
ఐతే ‘స్వాగ్’ సినిమా డిజిటల్‌గా రిలీజ్ కావడం ఆలస్యం.. దాని మీద నెటిజన్లు ప్రశంసల జల్లు కురిపిస్తున్నారు. ఇందులోని అనేక సన్నివేశాలకు సంబంధించి వీడియోలు సోషల్ మీడియాలో వైరల్ అవుతున్నాయి. సమకాలీన రాజకీయ, సామాజిక పరిస్థితులను ఉద్దేశించి ఇందులో వేసిన కౌంటర్ల మీద ఎక్కువ చర్చ జరుగుతోంది. ట్రెండీగా సాగిన అనేక సన్నివేశాలు, డైలాగుల గురించి నెటిజన్లు చర్చించుకుంటున్నారు.
ఏపీలో ప్రభుత్వం మారిన నేపథ్యంలో వైసీపీ మీద అనేక కౌంటర్లు పడ్డాయి. హైదరాబాద్‌లో చర్చనీయాంశంగా మారిన హైడ్రా మీద కూడా కొన్ని డైలాగులు పెట్టడం విశేషం. ఇందులో శ్రీ విష్ణు పోషించిన అనేక పాత్రలు.. ముఖ్యంగా ట్రాన్స్‌జెండర్ పాత్ర గురించి అందరూ గొప్పగా మాట్లాడుతున్నారు. ద్వితీయార్ధంలో ఎమోషనల్ సీన్లకు ప్రశంసలు లభిస్తున్నాయి. శ్రీ విష్ణు ‘స్వాగ్’ గురించి ఇన్‌స్టాగ్రామ్‌లో ఒక ఇంట్రెస్టింగ్ పోస్ట్ పెట్టాడు. థియేటర్లలో మిస్ అయిన వాళ్లు ఓటీటీలో చూసి కల్ట్ మూవీ అంటూ కొనియాడండి అంటూ ఇప్పటి ట్రెండుకు తగ్గట్లు కామెంట్ చేశాడు శ్రీ విష్ణు. ఎప్పట్లాగే ‘టీఎఫ్ఐ ఫెయిల్డ్ హియర్’ అనే హ్యాష్ ట్యాగ్ కూడా ‘స్వాగ్’కు మూవీకి పెడుతున్నారు నెటిజన్లు.
