మెగాస్టార్ మూవీ టైటిల్ మార్చేస్తున్న దర్శకుడు

మెగాస్టార్ చిరంజీవి ప్ర‌స్తుతం వ‌రుస సినిమాల‌ను లైన్‌లో పెట్టిన సంగ‌తి తెలిసిందే. ఇప్ప‌టికే కొర‌టాల శివ దర్శ‌క‌త్వంలో `ఆచార్య‌` చిత్రాన్ని పూర్తి చేసిన చిరంజీవి.. మోహ‌న్ రాజా ద‌ర్శ‌క‌త్వంలో `గాడ్ ఫాద‌ర్‌`, మెహ‌ర్ ర‌మేష్ ద‌ర్శ‌క‌త్వంలో `భోళా శంక‌ర్‌` సినిమాల‌ను ప‌ట్టాలెక్కించాడు. వీటి త‌ర్వాత బాబీతో చిరు త‌న 154వ సినిమాను చేయ‌నున్నాడు. `మెగా 154` వ‌ర్కింగ్ టైటిల్‌తో గత ఏడాది గ్రాండ్‌గా ఈ మూవీ ప్రారంభ‌మైంది.

మైత్రీ మూవీ మేక‌ర్స్ వారు నిర్మించ‌బోతున్న ఈ సినిమాకు రాక్ స్టార్ దేవిశ్రీ ప్ర‌సాద్ సంగీతం అందిస్తున్నాడు. మాస్‌ కథాంశంతో తెరకెక్కుతోన్న ఈ సినిమాలో చిరు మత్స్యకారుడిగా ఊర‌మాస్‌ గెటప్‌లో కనిపించ‌నున్నాడ‌ని తెలుస్తోంది. ఇక ఈ చిత్రానికి `వాల్తేరు వీరయ్య` అనే టైటిల్‌ను ఫిక్స్ చేశార‌ని ఎప్ప‌టి నుంచో జోరుగా ప్ర‌చారం జ‌రుగుతోంది.

అయితే లేటెస్ట్ స‌మాచారం ప్ర‌కారం.. బాబీ ఈ సినిమా టైటిల్‌ను ఛేంజ్ చేశార‌ట‌. వాల్తేరు వీర‌య్య కాకుండా `వాల్తేరు మొనగాడు` అనే టైటిల్ ఇంకా బెట‌ర్‌గా ఉంద‌ని బాబీ భావించార‌ట‌. చిరంజీవికి సైతం ఆ టైటిల్ న‌చ్చ‌డంతో.. `వాల్తేరు మొనగాడు`నే ఫైన‌ల్ చేసిన‌ట్లు ప్ర‌చారం జ‌రుగుతోంది. అంతే కాదు, త్వ‌ర‌లోనే ఈ కొత్త టైటిల్‌ను ఓ అదిరిపోయే పోస్ట‌ర్‌తో ప్ర‌క‌టించ‌నున్నార‌ని కూడా టాక్ న‌డుస్తోంది.

కాగా, బాబీ చిత్రం త‌ర్వాత చిరంజీవి వెంకీ కుడుముల డైరెక్ష‌న్‌లో ఓ మూవీ చేయ‌నున్నాడు. డివివి ప్రొడక్షన్స్ బ్యాన‌ర్‌పై భారీ బడ్జెట్ తో డివివి దాన‌య్య ఈ మూవీని నిర్మించ‌బోతున్నాడు. ఈ ప్రాజెక్ట్‌పై సైతం ఇటీవ‌లె అధికారిక ప్ర‌క‌ట‌న వ‌చ్చింది.