ఒకే నెలలో సాయిపల్లవి డబుల్ బొనాంజా

గత సంవత్సరం తండేల్ తర్వాత హీరోయిన్ సాయిపల్లవి దర్శనం బొత్తిగా లేకుండా పోయింది. ఈ ఏడాది ఏక్ దిన్ తో బాలీవుడ్ డెబ్యూ చేసింది కానీ టైటిల్ కు తగ్గట్టే అది కూడా ఒక్క రోజు ఆడి థియేటర్ల నుంచి వెళ్ళిపోయింది. అమీర్ ఖాన్ బ్యానర్ లో ఆయన కొడుకుతో నటించిన సంతృప్తి తప్ప ఇంకేం మిగల్లేదు. ఇంత గ్యాప్ రావడానికి కారణం రామాయణ. రెండు భాగాల ఈ విజువల్ గ్రాండియర్ కోసం ఫిదా భామ చాలా కాల్ షీట్లు ఇచ్చింది. పారితోషికం కూడా ఘనంగా ముట్టడం వేరే విషయం.

తన స్క్రీన్ దర్శనం కోసం ఎదురు చూస్తున్న అభిమానులకు గుడ్ న్యూస్ చెబుతూ కేవలం రెండు వారాల నిడివిలో సాయిపల్లవి రెండు రిలీజులు ఉండబోతున్నాయి. నవంబర్ 6 రామాయణ పార్ట్ వన్ రావడం దాదాపు ఖాయమే. ఓవర్సీస్ ఫిక్స్ అయ్యింది కానీ ఇండియా విడుదల తేదీ విషయంలో నిర్మాతలు మల్లగుల్లాలు పడుతున్నారు. రెండు రోజులు ఆలస్యంగా వస్తే ఎలా ఉంటుందనే ప్రపోజల్ మీద ఇంకా డెసిషన్ తీసుకోలేదట. ప్రమోషన్లు ఆల్రెడీ మంచి స్వింగ్ లో ఉన్నాయి.

నవంబర్ 20 ధనుష్ నటించిన ఓమ్ రిలీజ్ కానుంది. ఇది కూడా పలు వాయిదాల తర్వాత మోక్షం దక్కించుకుంటోంది. ఇందులో సాయిపల్లవి మెయిన్ లీడ్ కాగా శ్రీలీలతో పాటు తెరమీద సందడి చేయనుంది. ఇందులో మమ్ముట్టి ముఖ్యమైన క్యారెక్టర్ చేస్తున్నారు. దసరా దీపావళి అనుకుని ఫైనల్ గా ఈ రెండు పండగలు అయిపోయిన సీజన్ లో ఓమ్ వస్తోంది. కాకతాళీయంగా రామాయణ లాగా ఇది కూడా రెండు భాగాల సిరీస్ కావడం గమనించాల్సిన విషయం.

చూస్తుంటే రాబోయే రెండు నెలలు సాయిపల్లవి విరివిగా మీడియాకు అందుబాటులోకి రానుంది. ఇంత కరువు తీర్చేలా ఇవి హిట్టవ్వాలని ఫ్యాన్స్ కోరుకుంటున్నారు. రామాయణ, ఓమ్ రెండింటిలో సాయిపల్లవి చేసింది రెగ్యులర్ హీరోయిన్ పాత్రలు కాదు. పెర్ఫార్మన్స్ పరంగా చాలా ఛాలెంజ్ అనిపించేవి. క్లిక్ అయితే మటుకు తన పేరు దేశవ్యాప్తంగా మారుమ్రోగిపోవడం ఖాయం. ఇవి కాకుండా మణిరత్నం దర్శకత్వంలో విజయ్ సేతుపతితో చేస్తున్న ఇంజి వెల్లం వచ్చే ఏడాది రానుంది.