Gulte Telugu Telugu Political and Movie News Updates
భారత చెస్ ప్లేయర్ డి గుకేశ్ ప్రపంచ ఛాంపియన్‌షిప్‌లో చరిత్ర సృష్టించాడు. చెస్ ప్రపంచంలో అత్యున్నత స్థాయి విజయంగా గుర్తించబడే ప్రపంచ ఛాంపియన్ టైటిల్‌ను గెలుచుకున్నాడు. ఫైనల్లో చైనాకు చెందిన డింగ్ లిరెన్‌ను ఓడించి, 14వ గేమ్‌లో కీలక విజయాన్ని సాధించడం గుకేశ్ కు ఇది అత్యంత ప్రత్యేకమైన ఘట్టంగా మారింది.
ఎందుకంటే క్రీడా చరిత్రలో అత్యంత చిన్న వయసులోనే ప్రపంచ ఛాంపియన్‌గా అతను ఒక సరికొత్త రికార్డు క్రియేట్ చేయడం విశేషం. ఈ విజయంతో గుకేశ్, విశ్వనాథన్ ఆనంద్ తర్వాత ప్రపంచ ఛాంపియన్‌గా నిలిచిన రెండవ భారతీయుడిగా గుర్తింపు పొందాడు. అంతేకాకుండా, ఈ యవ్వన గ్రాండ్‌మాస్టర్ భారత చెస్ స్థాయిని అంతర్జాతీయంగా మరింత ఎత్తుకు తీసుకెళ్లాడు. రెండు వారాల పాటు జరిగిన ఈ టోర్నమెంట్‌లో గుకేశ్ అనేక సవాళ్లను ఎదుర్కొని విజయం సాధించడం భారత చెస్ అభిమానులను గర్వింపజేసింది.
గుకేశ్ యొక్క ప్రపంచ ఛాంపియన్‌షిప్ ప్రయాణం స్పెషల్ గా నిలిచింది. చెన్నైలో జరిగిన గ్రాండ్‌మాస్టర్ టోర్నమెంట్‌లో విజయం సాధించడమే అతని అద్భుత ప్రస్థానానికి నాంది పలికింది. ఆ తర్వాత క్యాండిడేట్స్ టోర్నమెంట్‌లో కూడా పటిష్ఠమైన ఆటతీరు ప్రదర్శించి, పలువురు ప్రఖ్యాత చెస్ ప్లేయర్లను ఓడించడం ద్వారా తన స్థాయిని నిరూపించాడు. సీనియర్ ఆటగాళ్లతో పోటీపడుతూ, ఈ అద్భుత విజయాన్ని అందుకున్నాడు. ఇంతటి ఘనత సాధించిన గుకేశ్‌పై ప్రపంచవ్యాప్తంగా ప్రశంసల వర్షం కురుస్తోంది. అతని విజయం భారత చెస్ చరిత్రలో ఒక కొత్త అధ్యాయానికి నాంది పలికింది.
